Эрондаги уруш давом этса, дунёда очлик рекорд даражага етиши мумкин — БМТ
Можаро давом этса, июнь ойига келиб очликдан азият чекаётганлар сони 360 миллиондан ошиши мумкин.
БМТнинг Жаҳон озиқ-овқат дастури Яқин Шарқдаги можаро давом этган тақдирда глобал озиқ-овқат инқирози кескин кучайиши мумкинлиги ҳақида огоҳлантирди. Бу ҳақда TASS ахборот агентлиги маълум қилди.
Ташкилот ижрочи директори ўринбосари Карл Скауниг маълум қилишича, агар Эрондаги уруш ва минтақадаги кескинлик июнь ойигача давом этса, озиқ-овқат нархларининг ошиши оқибатида яна қарийб 45 миллион киши ўткир очарчилик хавфига дуч келиши мумкин.
Унинг таъкидлашича, бундай ҳолат глобал очарчилик даражасини тарихдаги энг юқори кўрсаткичлардан бирига олиб чиқади. “Бизнинг таҳлилларимизга кўра, можаро чўзилса, нархларнинг кескин ошиши яна ўнлаб миллион одамларни ўткир озиқ-овқат танқислигига олиб келади. Бу эса жуда хавотирли истиқбол”, — деди Скауниг.
Маълумотларга кўра, ҳозирнинг ўзида дунё бўйлаб 319 миллион киши ўткир озиқ-овқат етишмовчилигидан азият чекмоқда. Бу кўрсаткич сўнгги йилларда рекорд даражага етган.
Мутахассислар прогнозига кўра, агар можаро давом этса ва глобал озиқ-овқат бозорида нархлар яна ошса, июнь ойига бориб очликдан азият чекаётганлар сони 360 миллион кишидан ошиши мумкин.
