Ислом цивилизацияси маркази сўз гўзаллигининг олий ифодаси

Тошкентга янгича кўркамлик бериб, пойтахтимизнинг марказида қад ростлаган Ислом цивилизацияси маркази нафақат илм-фан хазинаси, балки Ислом хаттотлик санъатининг олий намунасини ўзида ифода этади.

 

Бино деворларида қадимий куфий ва нафис сулс хатларида битилган муқаддас Қуръон оятлари, Пайғамбаримиз Муҳаммад соллаллоҳу алайҳи ва салламнинг ҳикматли ҳадислари ҳамда Аллоҳ таолонинг 99 гўзал исми (Асмаул ҳусна) ўзига хос маҳорат билан жойлаштирилган.

 

Бу хаттотлик дурдоналари асрлар оша яшаб келаётган исломий қадриятлар ва маърифат нурини бугунги кун билан боғловчи кўприк кабидир. Куфий хатининг қатъий геометрик шакллари ва сулс хатининг мафтункор эгилувчан ҳаракатлари уйғунлигида акс этган муборак битиклар, марказга ташриф буюрган ҳар бир инсонни тафаккурга чорлайди.

 

Ушбу фасадлар бинонинг безаги ўлароқ ўзбек хаттотлик мактабининг юксак чўққиси ҳамда Ислом оламининг маънавий қудратини намойиш этувчи очиқ осмон остидаги бетакрор гўзалликдир.

 

Таъкидлаш жоизки, безакларда муқарнаслар, ўсимликсимон ва геометрик нақшлар, шунингдек, Темурийлар меъморчилигига хос фируза-олтин билан сирланган кошинлар ишлатилган.

 

Матнлар билим, меҳр-шафқат, эътиқод, адолат, ота-онага ҳурмат ва руҳий камолот каби мавзуларни ҳам қамраб олган.

 

Марказ 2026 йилнинг энг диққатга сазовор масканларидан бири сифатида эътироф этилаётгани бежиз эмас. Марказнинг ўзига хос меъморий ечими — улкан гумбази ва бетакрор нақшлари сайёҳларга бир вақтнинг ўзида ҳам Ислом дини гўзаллигини ҳис қилиш, ҳам энг замонавий мультимедиа технологиялари орқали виртуал саёҳатга чиқиш имкониятини тақдим этади.