Исроил Али Ларижоний ҳалок бўлганини маълум қилди
Шунингдек, “Басиж” кучлари қўмондони Ғуломризо Сулаймонийнинг ҳам ўлдирилгани айтилмоқда.
Исроил мудофаа вазири Исраэл Катцнинг маълум қилишича, Эрон миллий хавфсизлик хизмати олий кенгаши раҳбари Али Ларижоний ва “Басиж” кучлари раҳбари Ғуломризо Сулаймоний тунги ҳаво зарбаларида ўлдирилган.
Эрон давлат оммавий ахборот воситалари ҳозирча бу хабарни тасдиқламади, бироқ Ларижонийнинг идорасидан тез орада расмий баёнот эълон қилиниши айтилган.
Исроил армияси аввалроқ Теҳрон бўйлаб кенг қамровли зарбалар берилганини ва Ливандаги “Ҳизбуллоҳ” жангариларига қарши ҳужумларни кучайтирилганини маълум қилган.
Ларижоний собиқ парламент спикери бўлиб, марҳум Али Хоманаийга ядровий музокараларда маслаҳатчи сифатида хизмат қилган. Сулаймоний эса “Басиж” кучларини бошқариб, ички норозиликларни бостиришда фаол иштирок этган ва АҚШ ҳамда Европа Иттифоқи томонидан санкцияга учраган.
Исроилга кўра, Сулаймонийнинг ўлдирилиши “Басиж”нинг бошқарув тизимига жиддий таъсир қилиши мумкин.
