Исроил Ливанда “Ҳизбуллоҳ”га қарши қуруқлик амалиётини бошлади

Исроил армияси Ливан жанубида “Ҳизбуллоҳ” гуруҳига қарши чекланган ва мақсадли қуруқлик амалиётлари бошланганини маълум қилди. 

 

Исроил ҳарбий кучлари операциядан кўзланган мақсад — гуруҳ аъзолари ва уларнинг инфратузилмасини йўқ қилишдан иборат эканини билдирди.

 

Маълумотларга кўра, Исроил ушбу мақсадда Литани дарёсидан жанубдаги ҳудудни тўлиқ назоратга олишни режалаштирмоқда.

 

The Times of Israel аввалроқ жанубий Ливандаги жангларда ўнлаб “Ҳизбуллоҳ” жангчилари йўқ қилинганини хабар қилган. Бу маълумотни Исроил мудофаа идораси тасдиқлаб, қурол омборлари, қўмондонлик маркази ва кузатув нуқталари ҳам йўқ қилинганини қўшимча қилган.

 

16 март куни кечқурун Германия, Италия, Франция, Буюк Британия раҳбарлари Исроилни Ливандаги ҳужумдан воз кечишга чақирган. Қўшма баёнотда бу ҳаракатлар “вайронкор гуманитар оқибатларга олиб келиши ва узоқ давом этувчи можарони келтириб чиқариши мумкинлиги” таъкидланган.

 

Байрут ҳукуматининг маълумотларига кўра, “Ҳизбуллоҳ” жойлашган ҳудудларга қарши Исроил зарбалари натижасида Ливанда бир миллиондан ортиқ киши уйини тарк этишга мажбур бўлган. Бу мамлакат аҳолисининг деярли ҳар олтинчисига тўғри келади. Энг кўп зарар жанубий Ливан ва пойтахтнинг жанубий қишлоқларидаги аҳоли учун юзага келган. Ҳужумлар оқибатида тахминан 850 киши ҳалок бўлган.