Истанбулда 7 йил аввал бедарак йўқолган ўзбекистонлик аёлнинг ўлдирилгани аниқланди
Маълум қилинишича, аёл эри томонидан ўлдирилиб, жасади чиқинди контейнерига ташланган.
Истанбулда 2019 йилда бедарак йўқолгани айтилган ўзбекистонлик Ҳуррият Турсунбоеванинг ўлдирилгани аниқланди. Бу ҳақда NTV хабар берди.
Маълум қилинишича, аёл турмуш ўртоғи томонидан ўлдирилган. Жиноят Истанбулнинг Ёқолган шахслар бюроси қошида тузилган махсус гуруҳ томонидан етти йил ўтиб қайта кўриб чиқилган тергов натижасида аниқланган.
Тергов давомида аёлнинг Малтепе туманидаги қўшнилари сўроқ қилинган. Гумонланувчи, яъни марҳуманинг эри Эрсин Й. қўшниларга рафиқаси депортация қилинганини айтган. Бироқ қўшнилар ўша пайтда хонадондан кучли ҳид келганини билдирган, эркак эса буни уйда кабутар боқаётгани билан изоҳлаган.
Текширувлар аёлнинг Туркиядан чиқиб кетгани ҳақида ҳеч қандай маълумот йўқлигини кўрсатган. Аксинча, унинг номидаги телефон мамлакат ичида фаол ишлатилган. Марҳуманинг опаси берган кўрсатмаларига кўра, эр-хотин ўртасида мунтазам жанжаллар бўлиб турган.
Гумонланувчи рафиқаси “йўқолганидан” сўнг, “мени ташлаб кетди”, деб ажрим учун ариза берган ва 2024 йилда аёл судга келмагани сабабли никоҳ расман бекор қилинган. Шунингдек, эркак бошқа шахс ҳужжатларидан фойдаланган ҳолда яшириниб юргани аниқланган.
Прокуратура рухсати билан ўтказилган текширувда хонадонда махсус луминол моддаси ёрдамида қон излари топилган.
Эрсин Й. 2026 йил 9 март куни Грузиядан Туркияга кириб келаётганида қўлга олинган. Сўроқ давомида у жиноятни тан олиб, жанжал вақтида рафиқасини уриб ўлдирганини билдирган.
Унинг айтишича, жасад бир муддат уйда сақланган, сўнг бўлакларга бўлиниб, чиқинди контейнерига ташлаб кетилган.
Ҳозирда суд қарори билан гумонланувчи ҳибсга олинган. Унга ҳужжатларини бериб, ёрдам берганликда гумон қилинган шахс эса суд назорати остида қўйиб юборилган.
