Навбатдан ташқари аттестациядан ўта олмаган педагоглар ишдан бўшатилиши айтилмоқда

Ижтимоий тармоқларда навбатдан ташқари аттестация синовларида салбий натижа қайд этган педагоглар мактаб раҳбарияти томонидан ишдан бўшатилиши мумкинлиги ҳақидаги хабарлар юзасидан расмий муносабат билдирилди.

 

Мактабгача ва мактаб таълими вазирлиги мактаб раҳбарияти ёки бошқа мансабдор шахсларнинг педагоглар олдига ишдан бўшаш каби талабларни қўйиши қонунчилик талабларига мутлақо зидлигини билдирди.

 

Расмий муносабатда қайд этилишича, Вазирлар Маҳкамасининг 2021 йил 17 сентябрдаги 572-сон қарори билан тасдиқланган Низомига кўра, навбатдан ташқари аттестацияда қатнашган ва ўта олмаган педагогларнинг малака тоифаси туширилмайди ҳамда уларга амалдаги ўз малака тоифаси бўйича ҳақ тўланишида давом этилади. 

 

Шундай экан навбатдан ташқари аттестацияда етарли балл тўплай олмаган педагоглар билан меҳнат шартномасининг бекор қилиниши ҳеч қандай қонуний асосга эга эмас.

 

“Амалдаги тартибга кўра, фақатгина олий маълумотга эга бўлмаган ҳамда мутахассис лавозимидаги педагоглар мажбурий аттестация синовларида қатнашиб ундан ўта олмаган тақдирда, меҳнат шартномаси ходимнинг малакаси етарли бўлмаганлиги сабабли бекор қилиниши мумкин. Бунда иш берувчи ходим билан тузилган меҳнат шартномасини бекор қилмаган тақдирда, мазкур педагоглар навбатдан ташқари аттестацияга кўпи билан кетма-кет икки марта қатнашиш ҳуқуқига эга”, дейилади вазирлик хабарида.

 

Шунингдек, хабарда мазкур имкониятлардан кейин ҳам педагогнинг аттестация синовларида салбий натижа қайд этиши ходим билан меҳнат шартномасининг меҳнат тўғрисидаги қонунчилик ҳужжатларида белгиланган тартибда бекор қилинишига асос бўлиши келтирилган.

 

Шу билан бирга, юқоридаги ҳолатдан бошқа ҳеч бир ҳолатда педагогларнинг аттестация синовларидаги салбий натижа қайд этиши уларнинг меҳнат шартномасини бекор қилинишига асос бўлмаслиги таъкидланган.