Сохта хайрия орқали терроризмни молиялаштириш ҳолатлари аниқланди
Бухорода фуқаро ижтимоий тармоқлар орқали хайрия маблағлари йиғиб, уларни экстремистик фаолиятни қўллаб-қувватлашга йўналтиргани фош этилди.
Сўнгги вақтларда хайрия ва эҳсон ниқоби остида терроризмни молиялаштириш ҳолатлари кузатилаётгани аниқланди.
Маълум қилинишича, Жанубий Кореяда ўзбекистонлик шахс сохта хайрия орқали 663 минг доллар маблағ йиғиб, унинг бир қисмини халқаро террористик ташкилотлар — “Катиба ат-тавҳид вал-жиҳод” ва ҲАМАСга ўтказган.
Шунингдек, Бухорода 1999 йилда туғилган шахс ижтимоий тармоқлар орқали хайрия маблағлари йиғиб, уларни экстремистик фаолиятни қўллаб-қувватлашга йўналтиргани аниқланган. Ушбу жараёнга унинг отаси ҳам жалб этилган.
Ҳозирда мазкур ҳолат бўйича бир неча шахсларга нисбатан Жиноят кодексининг 155-3-моддаси билан жиноят иши қўзғатилиб, тергов ҳаракатлари олиб борилмоқда. Ота суд ҳукми билан озодликдан маҳрум этилган, гумонланувчи ўғилга нисбатан эса қидирув эълон қилинган.
Мутахассислар таъкидлашича, айрим гуруҳлар интернет орқали, жумладан, гуманитар ёрдам ёки эҳсон сифатида маблағ йиғиб, уларни ноқонуний мақсадларга йўналтирмоқда. Бунда йиғилган маблағларнинг фақат кичик қисми хайрияга сарфланиб, қолган қисми террорчилик фаолиятини молиялаштиришга йўналтирилиши мумкин.
Шу муносабат билан фуқароларга хайрия қилишда фақат расмий ва ишончли манбалардан фойдаланиш, маблағлар ҳақиқатан ҳам муҳтожларга етиб боришига ишонч ҳосил қилиш тавсия этилмоқда.
