Солиқ қарздорлиги 1 млн сўмдан ошган фуқароларнинг электр тўлови чекланади
Мазкур тизим тажриба тариқасида Наманган вилоятида жорий қилинади.
16 апрелдан бошлаб Наманган вилоятида жисмоний шахсларнинг мол-мулк ва ер солиғи бўйича қарздорлиги 1 миллион сўмдан ошган тақдирда, электр энергиясини тўлаш имконияти вақтинча чекланади. Бу ҳақда Солиқ қўмитаси хабар берди.
Маълум қилинишича, тизим тажриба тариқасида Наманган вилоятида амалиётга татбиқ этилади ва “Soliq billing” автоматлаштирилган ахборот тизими орқали ишлайди.
Қарздор фуқаролар бир неча босқичда огоҳлантирилади. Жумладан, аввало солиқ ҳисоблангани ҳақида хабарнома, кейин SMS орқали эслатма юборилади. Агар фуқаро “Soliq” мобил иловасидан фойдаланса ёки my.gov.uz сайтидаги шахсий кабинети мавжуд бўлса, хабар шу каналлар орқали ҳам етказилади.
Шу билан бирга, SMS орқали электр тўлови чекланиши мумкинлиги ҳақида огоҳлантириш ҳам юборилади. Ушбу SMS'даги ҳавола орқали солиқ қарздорлиги қачон шакллангани ва огоҳлантириш қайси босқичда эканини фуқаро кузатиб бориши мумкин.
Агар барча огоҳлантиришларга қарамай қарздорлик бартараф этилмаса, фуқаронинг электр тўлови вақтинча чекланади. Қарздорлик йўқ қилингач, чеклов дарҳол бекор қилинади.
