Тошкентда ФВБ ходими олган порасини қайтараётган пайтда ушланди
Ходим хусусий клиниканинг ёнғинга қарши ҳолати бўйича ижобий хулоса беришни ваъда қилиб, 6,5 миллион сўм олган.
Тошкент шаҳрида Фавқулодда вазиятлар бош бошқармаси Юнусобод туман бўлими Фавқулодда вазиятлар профилактикаси бўлими инспектори МЧЖ раҳбаридан 6,5 миллион сўм олганлиги аниқланди. Бу ҳақда Zamon.uz'га ДХХ хабар берди.
Маълум қилинишича, инспектор Олмазор туманидаги хусусий клиниканинг ёнғинга қарши ҳолати бўйича ваколатли ҳамкасблари орқали ижобий хулоса беришни ваъда қилган, аммо сўнгра турли баҳоналар билан ваъдасини бажармаган.
Фуқаролар пулни қайтаришни талаб қилганидан сўнг, Давлат хавфсизлик хизмати ва Прокуратура органлари ҳамкорлигида тезкор тадбир ўтказилган. Инспектор олдин олган пулини қайтараётган вақтида ашёвий далиллар билан ушланди.
Ҳозирда унга нисбатан жиноий иш қўзғатилган ва “қамоқ” эҳтиёт чораси қўлланилган. Тергов жараёнлари давом этмоқда.
