Ўзбекистон Эронга инсонпарварлик ёрдами юборди

16 март куни Ўзбекистон Республикаси Ташқи ишлар вазирлиги хабарига кўра, Ўзбекистон томонидан Эрон халқига инсонпарварлик ёрдами етказилди.

 

Маълум қилинишича, ёрдам таркибидан ун, гуруч, шакар, макарон маҳсулотлари, кунгабоқар ёғи ва турли консервалар каби озиқ-овқат маҳсулотлари, шунингдек дори воситалари ҳамда тиббий буюмлар ўрин олган. Бир нечта юк машиналарида жўнатилган инсонпарварлик юки аллақачон манзилга етказилган.

 

Юкларни Дарагаз шаҳрида қабул қилиб олиш маросимида маҳаллий ҳокимият вакиллари, жумладан шаҳар ҳокими Мужтаба Базмара, шунингдек Эрон Ташқи ишлар вазирлигининг Хуросон Разавий вилоятидаги ваколатхонаси раҳбари Али Масумифар ҳамда Эроннинг Туркманистондаги элчиси Али Мужтаба иштирок этган.

 

Вазирлик юкларнинг аниқ ҳажми ва уларни етказишда қатнашган Ўзбекистон томони вакиллари ҳақида батафсил маълумот бермаган. Шу билан бирга, эълон қилинган суратларда Ўзбекистоннинг Туркманистондаги элчиси сифатида фаолият юритган Равшанбек Алимовнинг инсонпарварлик юкларини топшириш жараёнида иштирок этгани акс этган.

 

Расмийлар тадбир давомида Эрон халқига кўрсатилган ёрдам учун Ўзбекистон раҳбариятига миннатдорлик билдирган. Уларнинг таъкидлашича, мазкур ташаббус икки давлат ўртасидаги дўстлик ва ўзаро қўллаб-қувватлаш анъаналарининг ифодаси ҳисобланади.

 

Эслатиб ўтамиз, 28 февраль куни АҚШ ва Исроил томонидан Эронга қарши ҳарбий ҳаракатлар бошланган эди. Эрон эса жавобан Исроил ҳамда АҚШнинг минтақадаги ҳарбий объектларига ракета ва дронлар орқали зарбалар берган. Учинчи ҳафтага кирган можаро оқибатида 2 мингдан ортиқ инсон ҳалок бўлгани, қурбонларнинг аксарияти Эрон ва Ливан ҳудудларига тўғри келаётгани айтилмоқда.

 

Мазкур можаро Яқин Шарқ минтақасида беқарорлик кучайишига ҳамда глобал энергия бозорларида нархлар ўсишига сабаб бўлмоқда.