Ўзбекистонда Хитой ўйинчоқларида болалар учун хавф аниқланиб, савдодан чиқарилмоқда

Ўзбекистоннинг бир қатор ҳудудларидаги савдо шохобчаларида назорат харидлари ўтказилиб, болалар учун мўлжалланган ўйинчоқлар синовдан ўтказилди. Бу ҳақда Техник жиҳатдан тартибга солиш соҳасида назорат инспекцияси хабар берди.

 

Маълум қилинишича, Қорақалпоғистондаги назорат жараёнида Хитойда ишлаб чиқарилган “Baby Rattles Toys” ва “LOVELY BABY” ўйинчоқлари лаборатория синовларидан ўтказилди. Хулосага кўра, ушбу маҳсулотлар:

 

 

— механик зўриқишларга чидамсиз;

 

— фойдаланиш жараёнида тез бузилади ва истеъмол хусусиятларини йўқотади;

 

— болаларнинг жароҳатланиш хавфини оширади;

 

— декоратив қопламаси нам муҳит, бола сўлаги ва тер таъсирига чидамсиз бўлиб, зарарли кимёвий моддалар ажралиб чиқиши мумкин.

 

Шунингдек, Тошкент вилоятидаги назорат харидларида “Маленкий повар play the game” ва “Ёнувчи ўйинчоқ” маҳсулотлари текширилиб, уларнинг механик чидамлилиги пастлиги, тез бузилиши ва техник регламент талабларига жавоб бермаслиги аниқланган.

 

 

Наманган вилоятида эса Хитойдан импорт қилинган “Crystal mud” слайм ўйинчоғининг сифатсизлиги, таркибида зарарли элементлар миқдори юқорилиги ва ёрлиғидаги маълумотларнинг етарли эмаслиги қайд этилган.

 

 

Хабарда аниқланган камчиликлар юзасидан савдо субъектларига огоҳлантиришлар юборилгани, хавфли маҳсулотлар савдодан чиқарилиб, уларнинг реализацияси тўхтатилгани таъкидланган.