Ўзбекистонда кредит рекламаларида уни тўлай олмаслик ҳақида ҳам огоҳлантириш берилади
Ушбу ўзгариш аҳолининг кредит хатарларига оид хабардорлигини ошириш ва масъулиятли қарз олиш маданиятини шакллантиришга хизмат қилади.
Ўзбекистонда кредит ва микроқарз рекламаларида қарзни ўз вақтида тўламаслик оқибатлари ҳақида мажбурий огоҳлантириш киритиш назарда тутилган қонун лойиҳаси 17 март куни Олий Мажлис Қонунчилик палатаси депутатлари томонидан иккинчи ўқишда қабул қилинди.
Олий Мажлис Қонунчилик палатасининг мажлисида таъкидланишича, ҳозирда микроқарзлар рекламасида истеъмолчиларнинг эътибори асосан кредитни тез ва осон олиш имкониятига қаратилмоқда. Бироқ, бундай ёндашув келгусида юзага келиши мумкин бўлган молиявий мажбуриятлар ва хатарлар ҳақида етарли ахборот бермайди.
Қонун лойиҳасига кўра, “Реклама тўғрисида”ги қонуннинг 43-моддасига ўзгартириш киритилиб, кредитлар, жумладан микроқарзлар рекламасида қарз мажбуриятларини бажармаслик молиявий хатарларни келтириб чиқариши мумкинлиги ҳақида огоҳлантирувчи матн жойлаштирилиши мажбурий этиб белгиланмоқда. Ушбу огоҳлантириш реклама майдони ёки эфир вақтининг камида 10 фоизини эгаллаши лозим.
Қонун ташаббускорлари ушбу ўзгаришлар молиявий хизматлар рекламасини янада тартибга солиш, аҳолининг кредит хатарларига оид хабардорлигини ошириш ва масъулиятли қарз олиш маданиятини шакллантиришга хизмат қилишини таъкидламоқда.
Айни пайтда амалдаги қонунчиликка кўра, молиявий хизматлар рекламалари истеъмолчиларнинг ишончини суиистеъмол қилмаслиги, уларнинг тажрибаси ва билим етишмаслигидан фойдаланишга қаратилмаслиги ҳамда хизматларнинг муҳим шартларини очиб бериши шарт.
