Жаҳон банки Ўзбекистонда газ сизиб чиқишини камайтириш учун 10,6 млн доллар грант ажратади
Таъмирлаш ишлари орқали йилига 47,5 минг тонна газ сизиб чиқишининг олди олиниши режалаштирилмоқда
Жаҳон банки Ўзбекистонда газ транспорти инфратузилмасидаги сизиб чиқишларни камайтириш учун 10,6 миллион доллар миқдорида грант ажратади.
Банк томонидан эълон қилинган ҳисоботга кўра, мамлакатдаги газ узатиш тизимининг бир қисми эскиргани ҳамда узоқ вақт давомида етарли техник хизмат ва таъмирлаш ишлари амалга оширилмагани сабабли газ сизиб чиқишлари ва молиявий йўқотишлар юзага келмоқда.
Мутахассислар ҳисоб-китобига кўра, зарур таъмирлаш ишлари амалга оширилмаса, 2030 йилга бориб газнинг умумий йўқотишлари 1,75 миллиард кубометрга етиши мумкин. Бу эса тахминан 228 миллион доллар миқдорида йўқотилган даромадга тенг бўлади.
Грант маблағлари “Ўзтрансгаз” томонидан бошқариладиган газ узатиш тармоқларида сизиб чиқишларни аниқлаш ва бартараф этиш тизимини йўлга қўйишга йўналтирилади. Лойиҳа Global Gas Flaring Reduction Partnership траст жамғараси доирасида молиялаштирилади.
Режаларга кўра, 2029 йилга қадар амалга ошириладиган таъмирлаш ишлари орқали йилига қарийб 47,5 минг метрик тонна газ сизиб чиқишининг олди олинади. Тежалган газ истеъмолчилар ва бизнес субъектларига йўналтирилади, натижада йўқотишларнинг камайиши йилига тахминан 18 миллион доллар иқтисодий самара бериши кутилмоқда.
