Жиззахда ҳайдовчи эшакни машинада судради
Ҳолат юзасидан ҳайдовчига қонуний чора кўрилди.
Жиззах вилояти Зафаробод туманида фуқаро автомашинаси ортида эшакни судраб кетаётгани аниқланди. Бу ҳақда “Zamon” дастури хабар берди.
Маълум қилинишича, ҳодиса ижтимоий тармоқларда тарқалган видеода акс этгач, вилоят ички ишлар органлари ҳайдовчини аниқлаб, унга нисбатан маъмурий баённома расмийлаштирган.
Ҳайдовчининг айтишича, у Наманган вилояти Поп туманидан кўчат олиб келаётганида автомашинасида носозлик юзага келган. Кейин ҳайдовчи эшак димиқиб қолмаслиги учун юкхонадан уни туширган. Ҳайдовчи транспорт воситаси тузатилганидан сўнг эшакни яна юклаш учун шароит пайдо бўлмагани у сабаб уни 100- 150 метргача судраб борган. Ҳайдовчи ўз ҳаракатидан пушаймон эканини билдирган.
Ҳодиса юзасидан унга нисбатан Маъмурий жавобгарлик тўғрисидаги кодекснинг 111-моддаси (Ҳайвонларга шафқатсиз муносабатда бўлиш) бўйича маъмурий баённома расмийлаштирилди. Ҳужжатлар судга юборилган ва қонуний қарор қабул қилиниши кутилмоқда.
Мазкур моддага кўра, ҳайвонларга шафқатсиз муносабатда бўлиш жарима ёки 15 суткагача маъмурий қамоққа олишга сабаб бўлиши мумкин. Агар ҳуқуқбузарлик такрор содир этилса ёки ҳайвоннинг ўлимига олиб келса, жазо янада қаттиқлашади.
