Афғонистондан олиб кирилган 4,5 кг гашишнинг савдоси тўхтатилди

Фарғона ва Навоий вилоятларида гиёҳвандлик воситалари ноқонуний айланмасига қарши қаратилган тезкор тадбирлар натижасида бир қатор шахслар қўлга олинди. Бу ҳақда ДХХ Zamon.uz'га маълум қилди.

 

Давлат хавфсизлик хизмати ходимлари томонидан Сурхондарё ва Фарғона вилоятлари бўйича бошқармалар ҳамкорлигида Фарғона шаҳрида ўтказилган тадбирда 1989 йилда туғилган маҳаллий фуқаро текширувдан ўтказилди. Унинг сумкаси холислар иштирокида кўздан кечирилганда, умумий оғирлиги 4 кг 463 грамм бўлган “гашиш” моддаси аниқланиб, ашёвий далил сифатида олинди.

 

Тергов давомида мазкур жиноятга алоқадор бўлган унинг 1990 йилда туғилган укаси ҳам қўлга олинди. У аввал ҳам гиёҳвандлик воситалари билан боғлиқ жиноят учун судлангани маълум бўлди. 

 

Дастлабки маълумотларга кўра, ака-укалар ушбу моддани Афғонистондан контрабанда йўли билан олиб кириб, Фарғона вилояти ҳудудида сотишни режалаштирган.

 

Ҳолат юзасидан уларга нисбатан Жиноят кодексининг 246-моддаси 2-қисми ҳамда 25, 273-моддалари 5-қисми билан жиноят иши қўзғатилиб, “қамоқ” эҳтиёт чораси қўлланилди.

 

Шунингдек, Навоий шаҳрида 2000 йилда туғилган фуқаро тўхтатилиб текширилди. Унинг ёнидан 8 та ампулада гашиш мойи ҳамда фолга қоғозга ўралган 10 дона гашиш моддаси топилди.

 

Тезкор тадбир давомида унинг яшаш манзили кўздан кечирилганда, хонадонда нарколаборатория ташкил этилгани аниқланди. Манзилдан 34 дона изолентага ўралган гашиш, 63 та ампулада 88 грамм гашиш мойи, 2 та шприцда 25 миллиграмм гашиш мойи, шунингдек 640 грамм гашиш мойи ва 2 грамм қўлбола усулда тайёрланган гашиш далил сифатида олинди. 

 

Мазкур ҳолат юзасидан гумонланувчига нисбатан Жиноят кодексининг 273-моддаси 4-қисми “б” банди билан жиноят иши қўзғатилиб, унга нисбатан “қамоқ” эҳтиёт чораси қўлланилди.