Давлат грантида ўқиган битирувчилар учун мажбурий ишлаб беришнинг янги тартиби жорий қилиниши мумкин
Битирувчиларнинг мажбурий ишлаб бериш муддати таълим йўналиши хусусиятидан келиб чиқиб алоҳида белгиланади.
Ўзбекистонда давлат гранти асосида олий таълимни тамомлаган битирувчилар учун амалда бўлган камида уч йил ишлаб бериш талаби бекор қилиниши мумкин. Бу бўйича “Кадрларни давлат грантлари асосида мақсадли тайёрлаш тартиби тўғрисида низомни тасдиқлаш ҳақида”ги қарорга ўзгартириш киритиш таклифи жамоатчилик муҳокамасига қўйилди.
Амалдаги тартибга кўра, 2005 йилдан буён давлат гранти асосида бакалавриат ва магистратурада таҳсил олган битирувчилар камида уч йил ишлаб бериши шарт қилиб белгиланган.
Янги таклифга мувофиқ, ушбу қатъий муддат бекор қилиниб, битирувчиларнинг мажбурий ишлаб бериш муддати таълим йўналиши хусусиятидан келиб чиқиб алоҳида белгиланади. Бу ваколат Олий таълим, фан ва инновациялар вазирлигига берилиши кўзда тутилган. Шунингдек, ҳужжатда “камида уч йил” иборасини “мажбурий” сўзи билан алмаштириш таклиф этилмоқда.
Бундан ташқари, низомга қатор техник ўзгартиришлар ҳам киритилиши режалаштирилган. Жумладан, битирувчиларни ишга тақсимлашда қўлланиладиган “доимий яшаш жойи” атамасини “яшаш жойи” билан алмаштириш назарда тутилган.
Мазкур ҳужжат лойиҳаси жамоатчилик муҳокамаси учун 26 мартга қадар очиқ бўлади. Қарор тасдиқланган тақдирда, у расмий эълон қилинган кундан эътиборан кучга киради.
