Президент Самарқанддаги ташрифини Ёшлар креатив паркидан бошлади
Шунингдек, давлат раҳбари немис тилини ўқитиш марказида бўлди ва экофаоллар билан ҳам суҳбатлашди.
18 март куни Ўзбекистон Республикаси Президенти Шавкат Мирзиёев Самарқандга ташриф буюрди. Давлат раҳбари вилоятдаги ташрифини Самарқанд шаҳридаги Ёшлар креатив паркини кўздан кечириш билан бошлади.
Маълум қилинишича, Президент Шавкат Мирзиёев ташаббуси билан амалга оширилаётган “Яшил макон” умуммиллий лойиҳаси доирасида вилоятда ҳар йили 16 миллион тупдан ортиқ дарахт кўчатлари экилмоқда. Баҳорги мавсумда ҳам 6,3 миллион туп мевали ва манзарали дарахт, бута кўчатлари ўтқазиш режалаштирилиб, айни пайтда вилоятнинг барча ҳудудларида бу жараён давом этмоқда.
Шунингдек, Ўзбекистон кўчасида жойлашган собиқ ҳарбий госпиталь ўрнидаги 5,4 гектар майдонда ҳам 70 миллиард сўмдан ортиқ ҳомийлик маблағлари ҳисобидан Ёшлар креатив шаҳарчаси ва жамоат боғи ташкил этилган.
“Бу ерда маданий мерос объектлари рўйхатига олинган 5 та бино ва иншоот бўлиб, эндиликда улардан ёшлар учун замонавий ва рақамли кутубхона, кўп тармоқли ўқув маркази, креатив тўгараклар, сунъий интеллект, 3D моделлаштириш, робототехника ва киберспорт ўйинлари марказлари сифатида фойдаланилади. Ахборот-ресурс маркази, спорт заллари, ер ости экомузейи ташкил этилди”, дейилади хабарда.
Хабарга кўра, вилоят шахмат федерацияси ҳам янги боғда жойлашган бўлиб, федерация томонидан бу ерда ўқув-машғулот йиғинлари, мусобақалар ўтказиш имконияти мавжуд.
Боғда болалар аттракционлари, фитнесс заллари, стол теннис зали, теннис кортлари, воркаут ва мини гольф майдонлари барпо этилган. Ҳудудда Нуронийлар маскани, ўндан ортиқ айвончалар қурилган.
Шу билан бирга Президент “Profi deutsch” немис тилини ўқитиш ва имтиҳон маркази фаолияти билан танишди.
Марказда ёшлар немис тилини ўрганиб, халқаро “Тelc” сертификатини олади. Сертификат соҳиблари Германияда дуал касбий таълимда ўқишини давом эттиради, бандлиги таъминланади. Жорий йилда бундай имтиҳон марказини мамлакатимизнинг яна бешта ҳудудида очиш режалаштирилган.
Бундан ташқари Шавкат Мирзиёевга “Муҳаммад ал-Хоразмий ворислари” лойиҳаси бўйича қилинаётган ишлар ҳақида ҳам маълумот берилди. Лойиҳа доирасида 8-11-синф ўқувчиларига рақамли технологиялар ва хорижий тиллар чуқур ўргатилади. Ўқувни муваффақиятли якунлаганларга махсус сертификат берилади.
Ташриф давомида Алоқа банк ва Миллий банк консультатив марказининг тадбиркорлик фаолиятини бошлаётган ёшларга имтиёзли кредит ажратиш, стартап лойиҳаларини қўллаб-қувватлаш бўйича ишлари, Ёшлар ишлари ишлари агентлигининг “Ибрат фарзандлари”, “Мутолаа”, “Қизлар академияси” лойиҳалари билан танишилди.
Давлат раҳбари ёшлар билан мулоқот қилди, уларнинг лойиҳалари билан танишди. Жумладан, “Замин” халқаро жамоат фонди томонидан амалга оширилаётган “Eco-schools Uzbekistan” лойиҳасида иштирок этаётган ёш экофаоллар 2026 йил учун режалари ҳақида сўзлаб бердилар.
“Янги Ўзбекистонда юқори технологияли ишлаб чиқариш корхоналарни барпо этяпмиз, юқори даромадли иш жойлари очиляпти. Биз буни сизларга – билимли ёшларга ишониб қиляпмиз. Бунинг учун ҳар дақиқангиз келажагингиз учун хизмат қилсин, дўстингиз китоб бўлсин. Бирор билимни чуқур эгаллаш ва тўғри йўлни топиш учун инсонга диққат, сабр-тоқат, иштиёқ керак. Мана шу иштиёқингиз сўнмасин. Сизлар бераётган таклифлар бизнинг ислоҳотларимиз ғоясига мос, мен ҳар қандай таклиф ва ташаббусларингизни қўллаб-қувватлашга тайёрман, – деди Президент.
