Президент Шавкат Мирзиёев Рамазон ҳайитини нишонлаш тўғрисидаги қарорни имзолади
Туризм қўмитаси ва Транспорт вазирлиги Рамазон кунларида зиёратгоҳлар ва тарихий обидаларга қулай ташриф шароитини яратади.
Президент Шавкат Мирзиёев 18 март куни «Муборак Рамазон ҳайитини нишонлаш тўғрисида»ги қарорни имзолади. Қарорга кўра, 2026-йил 20-март куни Рамазон ҳайити байрами сифатида кенг нишонланади.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Дин ишлари бўйича қўмита, Ўзбекистон маҳаллалари уюшмаси, Ижтимоий ҳимоя миллий агентлиги ва бошқа ҳамкор ташкилотлар билан биргаликда байрам тадбирларини халқимизнинг миллий анъана ва урф-одатларига ҳамда Наврўз умумхалқ байрамига мувофиқ ўтказиш, ифторлик ва хайрия тадбирларини ташкил этиш вазифаси юклатилди.
Шунингдек, Туризм қўмитаси ва Транспорт вазирлиги Рамазон кунларида юртдошларимиз учун муқаддас зиёратгоҳлар ва тарихий обидаларга қулай ташриф имкониятларини яратади.
Ўзбекистон Миллий телерадиокомпанияси, Миллий ахборот агентлиги ва бошқа ОАВлар байрам тадбирларини кенг ёритиши тавсия қилинди.
Қарорнинг ижроси Ўзбекистон Республикаси Бош вазири Абдулла Арипов ва Президент маслаҳатчиси С.У. Умурзаков назоратига юклатилди.
