Самарқандда хориждан олиб келинган 38 килограммга яқин наркотик моддалар мусодара қилинди
Шунингдек, хусусий автомашина гаражига яширилган 9,04 кг опий экстракцияси аниқланган.
Самарқанддаги тезкор тадбирда контрабанда йўли билан олиб келинаётган катта миқдордаги наркотиклар тўхтатиб қолинди. Бу ҳақда ДХХ хабар берди.
Маълумотларга кўра, кузатув остида бўлган Ургут туманида яшовчи 1989 ва 1992 йилда туғилган 3 нафар фуқаро Тожикистон Республикасининг Панжикент туманига бориб, наркосавдогарлардан умумий оғирлиги 14,766 кг “опий” ва 14,958 кг “гашиш” моддаларини олиб, давлат чегарасини қоидабузарлик билан Ўзбекистон ҳудудига олиб ўтган вақтларида қўлга олинган.
Қонунбузарларга нисбатан Жиноят кодексининг 246-моддаси 2-қисми ва 273-моддаси 5-қисми бўйича жиноят иши қўзғатилди ва уларга нисбатан “қамоқ” эҳтиёт чораси қўлланган.
Бундан ташқари, Самарқанд шаҳридаги “Орзу” МФЙ ҳудудидаги хусусий автомашина гаражи ҳам текширилганда махсус тайёрланган хуфия жойдан мармар тошлар орасига яширилган 9,04 кг опий экстракцияси аниқланган.
Қайд этилишича Жиноят кодексининг 246-моддаси 2-қисми ва 273-моддаси 5-қисми билан иш қўзғатилиб, гараж эгасини қўлга олиш чоралари кўрилмоқда.
Мазкур жиноятлар учун қонунчиликда 20 йилгача озодликдан маҳрум қилиш жазоси белгиланган.
