Сурхондарёда қарз можароси ортидан ИИБ ходимлари ва фуқаролар тўқнашуви бўлгани айтилмоқда

Ижтимоий тармоқларда “Сурхондарёда қарздорлик можароси: ички ишлар ходимлари ва фуқаролар тўқнашуви” номи билан тарқалган видеолавҳа юзасидан расмий муносабат билдирилди.

 

Маълум қилинишича, 2 февраль куни Музработ тумани “Меҳнатобод” маҳалласида яшовчи Р.Р. исмли аёлнинг уйига 6 нафар эркак келиб, қарзга берилган пулларини талаб қилиб, манзилда жанжал чиқаришган ҳамда жамоат тартиби ва фуқароларнинг тинчлигини бузишган. Аёл Ўзбекистон Республикаси ЖКнинг 168-моддаси билан айбланувчи деб топилган.

 

Чақирув асосида воқеа жойига етиб борган профилактика инспекторлари томонидан жанжал қилаётган фуқаролар билан тушунтириш ишлари олиб борилган. 

 

Ҳолатни расмийлаштириш мақсадида фуқароларни туман ИИБга олиб кетиш жараёнида, улардан бири бўлган Ч.Х. ходимларга кескин қаршилик кўрсатиб, профилактика инспектори капитан Р. Чориевнинг юз қисмига боши билан зарба берган. Жавобгарликдан қутулиш мақсадида, Ч.Х. ўзини ҳушини йўқотгандай кўрсатиб олган.

 

Ч.Х. касалхонага олиб борилиб, соғлиғини текшириш жараёнида, унинг фарзанди 2008 йилда туғилган М.Х. етиб келиб, профилактика инспектори майор Э.Азамовга тўсатдан хужум қилган вақтида, ходим томонидан жисмоний куч ишлатиб, тўхтатилган.

 

Ҳозирда ҳолат юзасидан Музработ туман прокуратураси томонидан Ўзбекистон Республикаси ЖКнинг 219-моддаси 2-қисми билан жиноят иши қўзғатилиб, фуқаро Ч.Х.га нисбатан қамоқ тарзидаги эҳтиёт чораси қўлланилган, унинг вояга етмаган ўғли М.Х.га нисбатан қонунчиликка мувофиқ тилхат эҳтиёт чораси белгиланган.

 

Ички ишлар органлари ходимларининг қонуний талабларини бажармаслик ёки уларга қаршилик кўрсатиш қонунчиликка мувофиқ жавобгарликка сабаб бўлиши ҳақида огоҳлантирамиз.