Таиландда содир бўлган ЙТҲ оқибатида Ўзбекистон фуқароси ҳалок бўлди
Яна 4 нафар ўзбекистонлик тан жароҳатлари олган.
Таиланднинг Пхукет оролида сайёҳлик микроавтобуси иштирокида йўл-транспорт ҳодисаси содир бўлди. Бу ҳақда ТАСС ахборот агентлиги маълум қилди.
Дастлабки маълумотларга кўра, сайёҳлар Симилан ороллари томон йўл олган микроавтобус ҳайдовчиси бошқарувни йўқотиб, электр устунига урилиб кетган. Транспорт воситасида жами 12 нафар йўловчи бўлган.
Ҳодиса оқибатида бир нафар Ўзбекистон фуқароси воқеа жойида ҳалок бўлган. Яна тўрт нафар ўзбекистонлик турли даражадаги тан жароҳатлари олиб, маҳаллий шифохонага ётқизилган.
Шунингдек, авария натижасида саккиз нафар Россия фуқароси ҳам жароҳат олган. Улардан икки нафари оғир аҳволда экани айтилмоқда.
Микроавтобус ҳайдовчисининг маълум қилишича, ҳодиса олдинда ҳаракатланаётган юк машинаси тўсатдан тормоз бергани сабаб юз берган. Ҳозирда ҳолат юзасидан тергов ҳаракатлари олиб борилмоқда ва воқеанинг аниқ сабаблари ўрганилмоқда.
