Telegram бир кун ичида 100 мингдан ортиқ гуруҳ ва каналларни блоклади
2026 йил бошидан буён блокланган гуруҳ ва каналлар сони 10 миллиондан ошди.
Telegram мессенжери бир кун ичида 100 мингдан ортиқ гуруҳ ва каналларни блоклади. Бу ҳақда РИА Новости томонидан таҳлил қилинган платформа статистикаси маълумотларида қайд этилган.
Маълумотларга кўра, сешанба куни якунига келиб мессенжер жами 114 348 та гуруҳ ва канални блоклаган. Бу 10 мартдан бери бир кунда қайд этилган энг юқори блоклаш кўрсаткичларидан бири бўлди. Ўша куни 102 612 та гуруҳ ва канал блокланган эди.
Статистикага кўра, март ойи бошидан буён мессенжер жами 1 547 231 та гуруҳ ва канални блоклаган. Шу даврда 9 439 та ҳамжамият “терроризмга алоқадор” контент сабаб ёпилган.
2026 йил бошидан бери блокланган гуруҳлар ва каналларнинг умумий сони 10 186 435 тага етган. Шундан 41 619 таси “терроризмга алоқадор” деб баҳоланган ҳамжамиятлардир.
Telegram маълумотига кўра, платформадаги модерация жараёни 2015 йилдан буён фойдаланувчиларнинг шикоятлари ҳамда машинавий ўрганишга асосланган проактив мониторинг тизими орқали амалга оширилади. 2024 йил бошидан эса ушбу жараён сунъий интеллектга асосланган модерация воситалари билан янада кучайтирилган.
