Ўзбекистон Афғонистонга инсонпарварлик ёрдами юборди
Рамазон ҳайити муносабати билан етказилган мазкур ёрдам Ҳайратонда мамлакат вакилларига топширилди.
Ўзбекистон Республикаси номидан Афғонистон халқига инсонпарварлик ёрдами етказилди. Бу ҳақда Ўзбекистон ТИВ хабар берди.
Қайд этилишича, мазкур ташаббус Рамазон ҳайити муносабати билан афғон халқини қўллаб-қувватлаш ҳамда икки мамлакат ўртасидаги яқин қўшничилик ва дўстона муносабатларни янада мустаҳкамлаш мақсадида амалга оширилган.
Инсонпарварлик ёрдамининг умумий оғирлиги 290 тоннадан зиёд бўлиб, ун, гуруч, буғдой, ўсимлик ёғи, тез тайёрланадиган озиқ-овқат маҳсулотлари, макарон, қандолат ва бошқа турдаги маҳсулотлардан иборат.
Ушбу ёрдам Ҳайратонда Афғонистон вакилларига топширилган.
Вазирлик хабарига кўра, маросимда сўзга чиққан Балх вилояти губернатори ўринбосари Мавлавий Абу Идрис, Ташқи ишлар вазирлигининг Балх вилояти бўлинмаси раҳбарияти, шунингдек, Ҳайратон шаҳар ҳокимлиги вакиллари Ўзбекистон Республикаси Президенти Шавкат Мирзиёевга афғон халқига доимий кўрсатиб келинаётган эътибор, ғамхўрлик, амалий қўллаб-қувватлаш ва бирдамлик учун самимий миннатдорлик билдирган.
Шунингдек, тадбирда Ўзбекистоннинг Афғонистондаги Фавқулодда ва Мухтор Элчиси Ойбек Усманов ҳамда Сурхондарё вилояти ҳокими Улуғбек Қосимов иштирок этган.
Эслатиб ўтамиз, аввалроқ Ўзбекистон ҳозирда можаролар марказида қолган Эронга ҳам инсонпарварлик ёрдамини жўнатган эди.
