Афғонистонда бир йил ичида ОАВга босимнинг 200 дан ортиқ ҳолати қайд этилди
Бу кўрсаткич ўтган йилга нисбатан 20 фоиздан ортиқ ошган.
Афғонистонда 2025 йилда оммавий ахборот воситалари эркинлигини бузиш ва журналистларга нисбатан зўравонлик билан боғлиқ 207 та ҳолат қайд этилди. Бу ҳақда Tolo news Афғонистон Журналистлар Марказининг йиллик ҳисоботига таяниб хабар бермоқда.
Ҳисобот мамлакатда нишонланадиган Миллий журналистлар куни муносабати билан эълон қилинган. Унда Афғонистондаги сўз эркинлиги ва журналистлар фаолияти билан боғлиқ вазият таҳлил қилинган.
Марказ маълумотларига кўра, қайд этилган ҳолатлар орасида икки нафар журналистнинг ўлдирилиши, яна бир журналистнинг жароҳатланиши, ОАВ вакиллари ва таҳририят ходимларига нисбатан 183 та таҳдид, шунингдек журналистлар ҳамда ОАВ фаолларининг ҳибсга олиниши билан боғлиқ 21 та ҳолат мавжуд.
Ҳисоботда таъкидланишича, 2024 йилга нисбатан бундай ҳодисалар сони 20 фоиздан ортиқ ошган.
