Ҳайит ва Наврўз кунлари хавфсизликни таъминлаш учун 20 мингдан ортиқ ходим сафарбар этилади
2000 дан ортиқ масжидда ҳайит намозлари ҳамда 200 дан ортиқ ҳудудда оммавий тадбирлар назорат остида ўтказилади.
Ички ишлар вазирлиги Рамазон ҳайити ва Наврўз байрамлари муносабати билан мамлакат бўйлаб жамоат тартиби ва фуқаролар хавфсизлигини таъминлаш мақсадида кенг кўламли хавфсизлик чораларини жорий этмоқда.
Вазирлик маълумотига кўра, байрам тадбирлари давомида республика бўйлаб 20 мингдан ортиқ ҳуқуқни муҳофаза қилиш органлари ходимлари хизматга жалб этилади.
Мамлакатдаги 2000 дан ортиқ масжидларда ўтказиладиган ҳайит намозлари ҳамда юзлаб ҳудудларда ташкил этиладиган оммавий байрам тадбирлари махсус назорат остида ўтказилади.
Асосий оммавий тадбирлар республика бўйлаб 200 дан ортиқ ҳудудда ташкил этилиши режалаштирилган. Ҳайит намози ўқиладиган масжидларда намозхонлар оқимини тартибга солиш, жамоат тартибини сақлаш ва қўшимча хавфсизлик чораларини таъминлаш бўйича зарур ташкилий ишлар олиб борилади.
Йўл ҳаракати хавфсизлиги ва транспорт логистикасига ҳам алоҳида эътибор қаратилмоқда. Тадбирлар ўтказиладиган ҳудудлар, йўллар ва йирик бозорлар атрофида қарийб 2500 нафар йўл ҳаракати хавфсизлиги ходимлари навбатчилик қилади. Оммавий тадбирлар ўтказиладиган жойларда махсус тўсиқлар ўрнатилиб, 150 метр радиусгача бўлган ҳудудларда транспорт воситалари учун вақтинчалик тўхташ жойлари ташкил этилади.
Фуқароларга қўшимча қулайлик яратиш мақсадида йирик тадбир ўтказиладиган ҳудудларда йўқолган болаларни вақтинча жойлаштириш учун махсус хоналар ташкил этилади. Ушбу масканларда ҳуқуқни муҳофаза қилувчи ходимлар ҳамда психологлар фаолият юритиб, ота-оналарни тезкор аниқлаш ва болаларни ўз яқинларига етказиш бўйича ёрдам кўрсатади.
Шунингдек, сайёҳлар оқими юқори бўлиши кутилaётган Бўстонлиқ тумани, Паркент тумани, Зомин тумани ҳамда Шаҳрисабз тумани ҳудудларида ҳам хавфсизлик чораларини кучайтириш бўйича қўшимча тадбирлар амалга оширилмоқда.
Бундан ташқари, электр энергияси, газ ва сув таъминоти хизматлари кучайтирилган иш режимига ўтказилган. Ички ишлар органларининг 24 соатлик махсус гуруҳлари байрам кунларида жамоат тартиби ва фуқаролар хавфсизлигини таъминлаш мақсадида вазиятни доимий назорат қилиб боради.
