АҚШ давлат қарзи тарихда илк бор 39 триллион доллардан ошди
Бу ҳар бир америкалик ҳисобига ўртача 114 минг доллардан ортиқ қарз тўғри келмоқда.
АҚШ давлат қарзи тарихда илк бор 39 триллион доллардан ошди. Бу ҳақда TASS агентлиги АҚШ Молия вазирлиги маълумотларига таяниб хабар берди.
Маълум қилинишича, АҚШнинг умумий давлат қарзи ҳозирда 39,03 триллион долларни ташкил этмоқда. Бу ҳар бир фуқаро ҳисобига ўртача 114 минг доллардан ортиқ қарз тўғри келишини англатади. Мазкур кўрсаткич мамлакат тарихидаги энг юқори даража ҳисобланади.
Маълумотларга кўра, 2025 йил октябр ойида АҚШ давлат қарзи илк бор 38 триллион доллардан ошган эди.
Мутахассислар прогнозига кўра, келгуси ўн йил ичида АҚШнинг давлат қарзи мамлакат ялпи ички маҳсулотининг тахминан 120 фоизига етиши мумкин. Бу эса федерал ҳукумат қарзи бутун иқтисодиётнинг йиллик ишлаб чиқариш ҳажмидан ҳам ортиб кетишини англатади.
Шунингдек, Вашингтон ҳар йили давлат қарзи бўйича фоиз тўловларига қарийб 970 миллиард доллар сарфламоқда. Бу кўрсаткич айрим ҳисоб-китобларга кўра ҳарбий харажатлардан ҳам юқори бўлиб, 2020 йилдан буён уч бараварга ошган.
Мутахассисларнинг таъкидлашича, қарзнинг юқори даражаси федерал ҳукуматни фоиз тўловларига кўпроқ маблағ ажратишга мажбур қилади. Бу эса инфратузилма, таълим, соғлиқни сақлаш ва ижтимоий дастурлар учун ажратиладиган маблағларнинг қисқаришига олиб келиши мумкин.
Мутахассисларнинг фикрича, федерал бюджет сиёсатини қайта кўриб чиқиш ва ортиқча харажатларни қисқартириш орқали АҚШ бюджети оўн йил ичида мувозанатлаштириш имконияти мавжуд.
