Эрон узоқ давом этадиган урушга тайёргарлик кўрмоқда — Financial Times
Эрон санкциялар енгиллаштирилмасдан ҳарбий ҳаракатларни тўхтатишга рози эмас.
Financial Times нашрининг Эрон манбаларига таяниб хабар беришича, Эрон узоқ давом этиши мумкин бўлган ҳарбий қарама-қаршиликка тайёргарлик кўрмоқда.
Манбаларга кўра, Теҳрон расмийлари юзага келган можарони мамлакат учун мавжудлик даражасидаги таҳдид сифатида баҳоламоқда. Шу сабабли Эрон томони АҚШ ва Исроил келажакда яна ҳарбий зарбалар бермаслиги бўйича қатъий хавфсизлик кафолатлари тақдим этилишини талаб қилмоқда.
Эрон расмийлари, шунингдек, халқаро санкциялар енгиллаштирилмасдан туриб ҳарбий ҳаракатларни тўхтатиш бўйича келишувга боришдан манфаатдор эмаслигини билдирган. Уларнинг фикрича, бундай шартлар бўлмаган ҳолда тузиладиган ҳар қандай келишув келажакда янги ҳужумларга сабаб бўлиши мумкин.
Манбалар таъкидлашича, Теҳрон узоқ давом этадиган қарама-қаршилик стратегиясини танламоқда ҳамда эҳтимолий рақиблари учун келажакдаги ҳарбий амалиётлар нархини оширишга интиламоқда. Шу билан бирга, мамлакат можаронинг узоқ давом этиши эҳтимолини ҳам истисно қилмаяпти.
Аввалроқ АҚШ томони ҳарбий ҳаракатларни тўхтатиш имкониятини кўриб чиқаётганини билдирган эди. Бироқ мутахассислар можарога якун ясаш нафақат Вашингтон позициясига, балки Теҳрон илгари сурган шартларга ҳам боғлиқ эканини таъкидламоқда.
Нашр манбаларининг қайд этишича, ҳарбий ҳаракатлар интенсивлиги пасайган тақдирда ҳам Эрон минтақадаги босимни сақлаб қолиши мумкин. Жумладан, стратегик аҳамиятга эга Ҳормуз бўғози орқали кема қатновини чеклаш ёки тўхтатиш эҳтимоли ҳам тилга олинмоқда.
