Президент фармони билан 392 нафар маҳкум афв этилди
Афв этилганлар орасида 3 нафар хориж фуқароси, 26 нафар аёл, 166 нафар ёшлар ҳамда 24 нафар тақиқланган ташкилотлар фаолиятида иштирок этган шахслар бор.
Шавкат Мирзиёев томонидан Рамазон ҳайити ва Наврўз байрами арафасида бир гуруҳ маҳкумларни афв этиш тўғрисидаги фармон имзоланди. Бу ҳақда ЎзА хабар берди.
Фармон Ўзбекистон Республикаси Президенти томонидан амалга оширилаётган инсонпарварлик сиёсати доирасида қабул қилинган бўлиб, унга мувофиқ 392 нафар шахс афв этилди.
Маълум қилинишича, афв этилганларнинг 223 нафари жазодан тўлиқ озод этилган, 82 нафари муддатидан олдин шартли равишда озод қилинган.
Шунингдек, 34 нафар шахснинг жазоси енгилроқ турига алмаштирилган, 53 нафар маҳкумнинг жазо муддати қисқартирилган.
Афв этилганлар орасида 3 нафар чет эл фуқароси, 26 нафар аёл, 14 нафар 60 ёшдан ошган шахслар, 166 нафар ёшлар ҳамда 24 нафар тақиқланган ташкилотлар фаолиятида иштирок этганлар бор.
Масъул идораларга афв этилган шахсларни жамиятга мослаштириш, уларни иш билан таъминлаш ва соғлом турмуш тарзига қайтариш бўйича тегишли топшириқлар берилган.
