Россияда патент тизими бекор қилиниши мумкин
Мигрантларга фақат ротация асосида ишлашга рухсат бериш таклиф қилинди.
Россияда меҳнат мигрантлари фаолиятини тартибга солишга қаратилган янги таклифлар илгари сурилди. Сергей Миронов мигрантларга мамлакат ҳудудида фақат ротация (сменали) асосида ишлашга рухсат беришни таклиф қилди.
Адолатли Россия партияси етакчисининг ТАСС агентлигига маълум қилишича, амалдаги патент тизимини бекор қилиб, хорижий фуқароларни ишга жалб қилиш бўйича аниқ ва қатъий қоидаларни жорий этиш зарур.
Мироновнинг таъкидлашича, хорижий ишчилар Россияга фақат аниқ бир иш берувчи билан тузилган янги меҳнат шартномаси асосида келиши керак. Унга кўра, мигрантлар бошқа ташкилотларга ўтиши ёки бошқа ҳудудларга кўчиб ишлаши чекланиши лозим.
Шунингдек, сиёсатчи хорижий фуқароларга Россияга оила аъзоларисиз келишга рухсат берилиши кераклигини билдириб, агар қонун бузилса, мигрант билан бирга унинг оиласи ҳам мамлакатдан чиқарилиши мумкинлигини таъкидлаган.
Миронов мигрантлар оқимини камайтириш мақсадида “оммавий импорт” амалиётини тўхтатиш зарурлигини ҳам қайд этди.
Айни пайтда Россия Давлат Думаси 18 март куни мигрантлар учун қўшимча талабларни назарда тутувчи ҳукумат қонун лойиҳасини биринчи ўқишда қабул қилди. Ушбу ташаббус мигрантларнинг даромадларини назорат қилиш, шунингдек вақтинчалик яшаш рухсатномаси ва доимий яшаш рухсатномаларини бекор қилиш асосларини кенгайтиришни ҳам ўз ичига олади.
