“Сабримизнинг чегараси бор”: Саудия Арабистони Эронни огоҳлантирди

Саудия Арабистони ташқи ишлар вазири Файсал бин Фарҳон Ол Сауд Эронни Форс кўрфази давлатларига қарши ҳужумларни тўхтатишга чақириб, минтақа мамлакатларининг сабри чекланганини айтди. Бу ҳақда Al Jazeera хабар берди.

 

Вазирнинг таъкидлашича, Эрон томонидан амалга оширилаётган зарбалар олдиндан пухта режалаштирилган бўлиб, Саудия ва унинг иттифоқчилари зарур бўлса, кучли ҳарбий салоҳиятидан фойдаланишга тайёр. 

 

У қайси ҳолатда жавоб берилиши ҳақида аниқ маълумот бермади. Бироқ Теҳрон буни жиддий огоҳлантириш сифатида қабул қилиши кераклигини қайд этди.

 

Мазкур баёнот Саудия пойтахтида араб ва ислом давлатлари ташқи ишлар вазирлари иштирокида ўтказилган йиғилишдан сўнг янгради. Унда минтақадаги урушнинг кенгайиб бораётгани ва хавфсизликка таҳдидлар муҳокама қилинди.

 

Аввалроқ Эрон Форс кўрфазидаги энергетика объектларига, жумладан, Рас Лаффан саноат шаҳарчаси ҳамда БААнинг газ инфратузилмаларига зарба бергани ҳақида хабарлар тарқалган эди.

 

Ислом инқилоби қўриқчилари корпуси бу ҳужумларни Исроилнинг Жанубий Pars газ конига қилган зарбасига жавоб сифатида изоҳлаган.

 

Саудия томони, шунингдек, ҳаво ҳужумидан мудофаа тизимлари орқали Эрон томонидан учирилган ракеталар йўқ қилинганини маълум қилган.

 

Расмийларга кўра, ҳатто уруш якунланган тақдирда ҳам Эрон билан муносабатларни тиклаш узоқ вақт талаб этади. Саудия ташқи ишлар вазири ишонч деярли бутунлай йўқолганини билдириб, Теҳронни вазиятни кескинлаштирмасдан, зудлик билан ўз сиёсатини қайта кўриб чиқишга чақирди.