Шавкат Мирзиёев Имом Бухорий мажмуасига ташриф буюрди
Президент барчани мажмуанинг қайта қуриб битказилгани билан табриклади.
Президент Шавкат Мирзиёев 19 март куни Самарқанд вилояти Паяриқ туманида қайтадан бунёд этилган Имом Бухорий мажмуасига ташриф буюрди.
Зиёратгоҳнинг қоқ марказида буюк ҳадисшунос Имом Бухорийнинг мақбараси ўрин олган бўлиб, давлати раҳбари мақбарани зиёрат қилди. Қуръон тиловат этилиб, дуо ўқилди.
“Муқаддас заминимиз дунёга мана шундай машҳур алломани бергани билан ҳар қанча фахрлансак, арзийди. Эл-юртимизнинг фидокорона меҳнати билан бугун орзу-ниятларимиз рўёбга чиқди. Бу бетакрор зиёратгоҳни Имом Бухорий бобомизнинг оламшумул мавқеига, юксак мақомига муносиб даражада бунёд этишга муяссар бўлдик. Мана шундай табаррук маскан барчамизга муборак бўлсин,” – деди Президент.
