Тошкентда иситиш мавсуми 24 мартдан якунланади
Об-ҳаво шароити ва иссиқлик таъминоти тизимларининг фаолияти доимий кузатиб борилади ҳамда зарурат туғилганда тезкор чора кўрилади.
Тошкентда барқарор илиқ баҳор об-ҳавоси кузатилаётгани сабабли иситиш мавсуми босқичма-босқич якунланади. Бу ҳақда Тошкент шаҳар ҳокимлиги хабар берди.
Маълум қилинишича, иситиш мавсумини якунлаш 24 мартдан бошланиши режалаштирилган бўлиб, у босқичма-босқич амалга оширилади. Бундай ёндашув турар жой биноларида ҳароратнинг кескин ўзгаришига йўл қўймайди ҳамда муҳандислик тизимларининг барқарор ишлашини таъминлайди.
Аҳоли учун қулайлик яратиш мақсадида келгуси байрам кунлари иссиқлик таъминоти сақлаб қолинади.
Хабарга кўра, бу қарор коммунал инфратузилмага тушадиган юкламани камайтириш ва ресурслардан оқилона фойдаланишни таъминлашга ҳам хизмат қилади. Аҳоли байрам кунларини хавфсиз ва қулай оила даврасида ўтказиши учун барча чоралар кўрилган.
Шу билан бирга, об-ҳаво шароити ва иссиқлик таъминоти тизимларининг фаолияти доимий кузатиб борилади ҳамда зарурат туғилганда тезкор чора кўриш учун шай ҳолат таъминланади.
