Тошкентдан Чорвоққа мавсумий автобус қатнови йўлга қўйилади
Қатновлар ҳар куни соат 06:00 дан бошланиб, 1,5 соат интервал билан амалга оширилади.
2026 йил 23 мартдан бошлаб Тошкент - Чорвоқ йўналишида автобус қатнови ишга туширилади. Бу ҳақда “Тошшаҳартрансхизмат” хабар берди.
Мазкур йўналиш Машинасозлар метросидан Чорвоқ (Ҳумсон қўрғони)гача қатновни таъминлайди.
Маълум қилинишича, йўналишга замонавий MAN RR3 русумидаги 47 ўриндиқли, кондиционерли автобуслар бириктирилади. Йўл кира нархи 25 минг сўм этиб белгиланган.
Қатновлар ҳар куни соат 06:00 дан бошланиб, 1,5 соат интервал билан амалга оширилади. Йўл давомийлиги ўртача 1 соат 30 дақиқани ташкил этади. Сўнгги рейс Чорвоқдан соат 20:30 да йўлга чиқиб, соат 22:00 да пойтахтга етиб келади.
Автобуслар Ҳумсон қўрғонигача Махтумқули кўчаси, Янги Ўзбекистон боғи, Хожикент ва Чиноркент орқали ҳаракатланади.
Тўловни нақд пулда ҳам, банк карталари орқали ҳам амалга ошириш мумкин.
