Ўзбекистон мобил рақамлари хорижий сайтларда онлайн сотилаётгани айтилмоқда
Рақамли технологиялар вазирлиги бунга муносабат билдирди.
Ижтимоий тармоқларда Ўзбекистоннинг мобил рақамлари халқаро ва норасмий онлайн-сервисларда сотилаётгани акс этган скриншотлар тарқалди. Ҳолат юзасида Рақамли технологиялар вазирлиги муносабат билдирди.
Вазирлик баёнотида кўрсатилган виртуал рақамлардан телефон рақамлари сифатида фойдаланиб бўлмаслиги маълум қилинган.
Хабарда қайд этилишича, бундай рақамлар орқали интернет хизматларидан ҳам фойдаланиш имкони йўқ.
“Шу билан бирга, фуқароларнинг шахсга доир маълумотларини ноқонуний қўлга киритиш имкони мавжуд эмаслиги сабабли ваҳимага ўрин йўқ”, дейилади вазирлик баёнотида.
Вазирлик маълумотларига кўра, халқаро ва норасмий онлайн-сервисларда АҚШ, Канада, Буюк Британия, БАА, Португалия, Ветнам ва бошқа давлатлар виртуал рақамлари ҳам мавжуд. Бундай сервислардан олинган виртуал рақамлардан ижтимоий тармоқлар, электрон почталар ёки бошқа платформаларда рўйхатдан ўтиш учун фақат бир марталик махсус код орқали қисқа муддатга фойдаланиш мумкин.
“Ахборот технологиялари ёрдамида содир этиладиган жиноятларга қарши курашни кучайтириш мақсадида барча мобил алоқа операторлари тармоқларида рақамларни сохталаштириш ҳолатларини аниқлаш ва олдини олиш тизими жорий этилиб, доимий равишда такомиллаштирилмоқда”, — дея қўшимча қилди вазирлик.
Шунингдек, вазирлик аҳолига my.gov.uz порталидаги “Менинг рақамларим” хизматидан фойдаланиб, ўз номига расмийлаштирилган мобил рақамларини кузатиб бориш мумкинлигини эслатди.
