Ўзбекистоннинг учта ҳудудда минглаб контрафакт ва яроқсиз дори воситалари фош этилди
Ҳозирда терговга қадар текширув ишлари олиб борилмоқда
Наманган, Қашқадарё ва Самарқандда сифат кафолатига эга бўлмаган ва контрафакт дори воситалари муомаласига чек қўйилди. Бу ҳақда Zamon.uz'га ДХХ маълум қилди.
Маълум қилинишича, Косонсой туманида яшовчи уч нафар фуқаро томонидан маҳаллий маҳаллалар ҳудудида ташкил этилган учта “яширин омбор” фош этилди. У ерда жами 723 турдаги 57 мингдан ортиқ хорижда ишлаб чиқарилган, сифат сертификатига эга бўлмаган ҳамда айримларининг яроқлилик муддати ўтган дори воситалари сақлангани аниқланди. Барча маҳсулотлар процессуал тартибда олиб қўйилди.
Шунингдек, Қарши туманида 1965 йилда туғилган шахс ўз уйида лицензиясиз дорихона ташкил этгани маълум бўлди. У ерда 82 турдаги 1500 дан ортиқ ҳужжатсиз дори воситалари ноқонуний равишда сотилаётгани қайд этилди.
Самарқанд шаҳрида эса ижарага олинган омборхонада 225 турдаги 14 мингдан зиёд истеъмолга яроқсиз дори воситалари сотиш мақсадида сақланаётгани фош қилинди.
Ҳозирда барча ҳолатлар юзасидан олиб қўйилган дори воситалари экспертизага юборилган бўлиб, терговга қадар текширув ишлари олиб борилмоқда.
