2026 йил учун энг бахтли мамлакатлар рейтинги эълон қилинди
Жаҳон бахт ҳисоботида Ўзбекистон 6,283 балл билан 53-ўринда қайд этилди.
20 март — Халқаро бахт куни арафасида 2026 йилги Жаҳон бахт ҳисоботи эълон қилинди. Ҳисоботга кўра, Ўзбекистон глобал рейтингда 53-ўринни эгаллади.
Мутахассислар мамлакат аҳолиси ҳаётдан қониқиш даражасини 10 баллдан 6,283 балл билан баҳолаган. Ҳисобот ҳар йили эълон қилинади ҳамда у Оксфорд университетининг фаровонликни ўрганиш маркази томонидан Gallup ва БМТ билан ҳамкорликда тайёрланади.
Тадқиқот методологияси 140 та мамлакат ва ҳудудда ўтказилган, қарийб 100 минг нафар респондент иштирок этган сўровнома натижаларига асосланади. Иштирокчилар ўз ҳаётини Cantril Ladder шкаласи орқали баҳолайди, унда 10 балл энг яхши ҳаёт, 0 балл энг ёмон ҳолатни англатади. Рейтинг тузишда шунингдек аҳоли жон бошига тўғри келадиган ЯИМ, шахсий эркинлик даражаси, коррупция ҳақидаги тасаввурлар ва умр кўриш давомийлиги каби омиллар ҳам инобатга олинади.
МДҲ давлатлари орасида етакчи ўринни Қозоғистон эгаллаб, 33-ўринга кўтарилган. Мintaқадаги бошқа давлатлар қуйидагича жойлашди: Қирғизистон – 66-ўрин, Молдова – 77-ўрин, Россия – 79-ўрин. Шунингдек, Тожикистон 88-ўринни, Арманистон 89-ўринни ва Озарбайжон 102-ўринни эгаллади.
Глобал рейтингда эса Финляндия кетма-кет тўққизинчи йил дунёнинг энг бахтли мамлакати деб топилди. Кучли бешликдан шунингдек Исландия, Дания, Коста-Рика ва Шветсия жой олди.
Top-10 таликка яна Норвегия, Нидерландия, Исроил, Люксембург ҳамда Швейцария кирди. Рейтингнинг энг қуйи поғонасида эса Афғонистон жойлашди. Шунингдек Ботсвана, Зимбабве, Малави ва Сьерра-Леоне ҳам энг паст ўринларни эгаллади.
Ҳисоботда ёшлар фаровонлигига рақамли технологиялар таъсири ҳам алоҳида таҳлил қилинди. Тадқиқотчиларга кўра, интернетдан ўқиш, мулоқот ва ижод учун фойдаланиш ҳаётдан қониқиш даражасини ошириши мумкин. Бироқ ижтимоий тармоқларни ёки ўйинларни мақсадсиз кўриш аксинча фаровонлик ҳиссининг пасайишига олиб келиши эҳтимоли юқори.
Умумий хулосаларга кўра, ижобий ҳис-туйғулар глобал миқёсда салбий ҳиссиётларга нисбатан икки баробар кўп учрайди. Шу билан бирга, айрим ҳудудларда салбий тажрибалар даражаси аста-секин ортиб бораётгани қайд этилган.
