АҚШнинг Эронга қарши операцияси харажатлари 25 миллиард доллардан ошди
Оқ уй аввалроқ операция қийматини 12 миллиард доллар деб баҳолаган эди.
АҚШнинг Эронга қарши олиб бораётган ҳарбий операцияси учун сарфланган харажатлар 25 миллиард доллардан ошгани маълум қилинди.
Ҳарбий харажатларни кузатиб борувчи ихтисослашган онлайн платформа — Iran War Cost Tracker томонидан эълон қилинган янгиланган маълумотларга кўра, АҚШнинг ушбу ҳарбий кампанияси учун сарфланган умумий маблағ аллақачон 25 миллиард доллардан ортган.
Портал муаллифлари ҳисоб-китоблар Пентагон томонидан АҚШ Конгрессига тақдим этилган расмий ҳисоботларга асосланганини таъкидлаган. Мазкур ҳужжатларга кўра, жанговар ҳаракатларнинг дастлабки олти кунининг ўзи АҚШ бюджетига тахминан 11,3 миллиард долларга тушган.
Шунингдек, портал ҳисоб-китобларига кўра, операцияни давом эттириш учун кунлик харажатлар ўртача 1 миллиард долларни ташкил этмоқда. Натижада реал вақт режимидаги ҳисоблагич ҳарбий кампания АҚШ солиқ тўловчиларига ҳар сонияда қарийб 11,5 минг долларга тушаётганини кўрсатмоқда.
Аввалроқ Оқ уй Миллий иқтисодий кенгаши раиси бошқа рақамларни келтирган эди. Унинг маълум қилишича, 16 март ҳолатига кўра Эрон операциясининг умумий қиймати 12 миллиард доллар атрофида бўлган.
Эслатиб ўтамиз, 28 февраль куни АҚШ ва Исроил томонидан Эронга қарши кенг кўламли ҳарбий операция бошланган эди. Ҳужумлар давомида мамлакатнинг йирик шаҳарлари, жумладан Теҳрон ҳам нишонга олинган.
