Қирғизистонлик қори Қуръон тиловати бўйича яна жаҳон чемпиони бўлди
Танловда дунёнинг турли мамлакатларидан минглаб иштирокчилар қатнашиб, финалга 64 нафар қори етиб борган.
Қирғизистонлик Қуръон қориси Муҳаммадали Қори Умаров халқаро Қуръон тиловати мусобақасида яна бир бор биринчи ўринни қўлга киритди. Бу ҳақда Қирғизистон мусулмонлари диний бошқармаси матбуот хизмати маълум қилди.
Маълум қилинишича, танлов 17 март куни Жидда шаҳрида, Саудия Арабистони ҳудудида ўтказилган. Мусобақа якунига кўра, Муҳаммадали Қори Умаров биринчи ўринни эгаллаб, 50 минг Саудия риали (тахминан 13 минг АҚШ доллари) миқдоридаги мукофот билан тақдирланди.
Танловда дунёнинг турли мамлакатларидан ўн мингга яқин иштирокчи қатнашиш учун ариза топширган. Улардан 2 минг нафари саралаб олиниб, мусобақада қатнашган. Саккиз кун давом этган баҳслар натижасида 64 нафар иштирокчи финал босқичига йўл олган.
Мусобақанинг асосий талаблари Қуръонни тўлиқ ёд олиш ҳамда тажвид қоидаларига қатъий амал қилган ҳолда қироат қилишдан иборат бўлган. Якуний натижаларга кўра совринли ўринлар қуйидагича тақсимланган:
1-ўрин — Қирғизистон
2-ўрин — АҚШ
3-ўрин — Миср
4-ўрин — Сурия
5-ўрин — Швеция
Ғолиб ўз чиқишида яна бир бор халқаро миқёсда биринчи ўринни қўлга киритганидан мамнунлигини билдириб, у эришилган натижада Қирғизистон халқининг қўллаб-қувватлаши ва дуолари катта аҳамиятга эга бўлганини қайд этган.
Маълумот учун, Муҳаммадали Қори Умаров ҳозирда Мадина Ислом университети Қуръон факультетининг тўртинчи курс талабаси ҳисобланади.
Аввалроқ, 2022 йил 22 сентябр куни Макка шаҳрида 111 мамлакат вакиллари иштирок этган Бутунжаҳон Қуръон тиловати ва тафсири мусобақасида ҳам у ғолибликни қўлга киритиб, 250 минг риал мукофотга сазовор бўлган эди.
