Садир Жапаров ва Қамчибек Ташиев ҳайит намозини адо этди
Собиқ Миллий хавфсизлик қўмитаси раиси Ташиев нотўғри хатти-ҳаракатлари учун узр сўради.
Қирғизистон Президенти Садир Жапаров ва Миллий хавфсизлик қўмитаси собиқ раиси Қамчибек Ташиев 20 март куни ҳайит намозини адо этдилар. Бу ҳақда Президент матбуот хизмати маълум қилди.
Садир Жапаров Бишкек шаҳридаги Эски майдонда 30 мингдан ортиқ одам иштирок этган намозни ўтказди. Майдон атрофида жамоат тартибини таъминлаш мақсадида милиция ходимлари ва шифокорлар навбатчилик қилган. Президент табригида Рамазон ойининг маънавий аҳамияти таъкидланди ва дунё бўйлаб тинчлик ва барқарорлик ўрнатилишига умид билдирилди.
Қамчибек Ташиев эса “Жал” микрорайонида ўтказилган ҳайит намозида иштирок этди. Ижтимоий тармоқларда тарқалган видеоларда унинг ёнида Ўш шаҳрининг собиқ мери Женишбек Токторбаев ҳам кўринган. Намоздан сўнг Ташиев барча аҳолини Рамазон ҳайити билан табриклаган ва нотўғри хатти-ҳаракатлар қилган бўлса узр сўрашини билдирган.
Эслатиб ўтамиз, 10 февраль куни Қамчибек Ташиев Қирғизистон Миллий хавфсизлик давлат қўмитаси раиси лавозимидан озод қилинган эди.
