АҚШ Эрон ҳудудига қўшин киритишга тайёргарлик кўрмоқда — CBS News
Манбаларга кўра, ҳарбийлар эҳтимолий операция вақтида Эрон аскарларини қўлга олиш ва уларни қаерга жойлаштириш масалаларини ҳам муҳокама қилган.
Пентагон АҚШ қуруқлик қўшинларини Эронга юбориш учун тайёргарлик кўрмоқда. Бу ҳақда CBS News манбаларга таяниб хабар берди.
Манбаларнинг билдиришича, ҳарбий қўмондонлар Президент Доналд Трамп кўриб чиқаётган эҳтимолий қарорлар учун аниқ таклифлар тайёрлаган. Трампнинг ўзи ҳам бу масалани муҳокама қилган, бироқ қандай шароитда қўшин юборилиши ҳозирча номаълум.
Пайшанба куни у журналистларга: “Мен ҳеч қаерга қўшин юбормайман, агар юборсам ҳам, бу ҳақда айтмаган бўлардим”, — деган.
АҚШ Марказий қўмондонлиги бу борадаги саволларни Оқ уй ва Пентагонга йўналтирди.
Оқ уй матбуот котиби Керолайн Левиттнинг айтишича, Пентагон президент учун турли вариантларни тайёрлайди, аммо бу ҳали қарор қабул қилинганини англатмайди. Ҳозирча қўшин юбориш режалаштирилмаган.
Манбаларга кўра, ҳарбийлар эҳтимолий операция вақтида Эрон аскарларини қўлга олиш ва уларни қаерга жойлаштириш масалаларини ҳам муҳокама қилган.
Шу билан бирга, АҚШ 82-ҳаво-десант дивизиясининг айрим қисмларини Яқин Шарққа юборишга тайёргарлик кўрмоқда. Режаларда тезкор ҳарбий кучлар ва денгиз пиёдалари бўлинмалари ҳам бор.
“Ҳозирда минглаб денгиз пиёдалари минтақага йўналтирилмоқда. Ҳафта бошида Калифорниядан учта ҳарбий кема ва тахминан 2 200 нафар ҳарбий жўнаб кетган. Бу уруш бошланганидан бери юборилган иккинчи шундай бўлинма бўлиб, етиб бориши бир неча ҳафта вақт олади”, дейилади хабарда.
