“Ҳавода Наврўзнинг ифорини сезмайсиз”: Эрон уруш фонида байрамни қарши олди
Ҳужумлар хавфига қарамай, аҳоли байрам анъаналарини сақлашга уриниб, Ҳафт Син дастурхонини тайёрламоқда.
Эрон бу йил Наврўз байрамини кескин ҳарбий вазият фонида нишонламоқда. 28 февралдан буён давом этаётган АҚШ ва Исроил зарбалари оқибатида мамлакатда хавфсизлик ва иқтисодий ҳолат ёмонлашиб, анъанавий байрам кайфияти сезилмаяпти.
Инсон ҳуқуқларини ҳимоя қилувчи ташкилот маълумотларига кўра, зарбалар натижасида 3 114 киши ҳалок бўлган, улардан 1 354 нафари тинч аҳоли, камида 207 нафари болалардир. Теҳрон бунга жавобан АҚШ ҳарбий базалари жойлашган минтақадаги мамлакатларга зарба бермоқда.
Маҳаллий аҳолининг айтишича, бу йилги Наврўз аввалгилардан тубдан фарқ қилади. Дамавандда яшовчи фуқаролар уруш сабаб кундалик ҳаёт издан чиққанини, айримлар эса хавфсизлик сабаб пойтахтдан кўчишга мажбур бўлганини билдирган. Теҳрон эса энг кўп зарбаларга учраган ҳудудлардан бири бўлиб қолмоқда.
BBC суҳбатдошлари уруш оқибатида иш ўринлари қисқараётгани ва инфратузилма зарар етгани ҳам аҳолининг асосий хавотирларига айланганини билдирган. Айримлар вазият давом этса, мамлакат келажаги хавф остида қолиши мумкинлигини таъкидламоқда.
“Одатда Наврўз олдидан гавжум бўладиган бозорлар ва савдо марказларида бу йил ҳаракат сезиларли даражада камайган. Фуқаролар харид пайтида ҳаво ҳужумлари хавфи борлигини айтмоқда. Шунга қарамай, айримлар байрам анъаналарини сақлашга уриниб, хусусан Ҳафт Син дастурхонини тайёрламоқда”, дейилади хабарда.
Бироқ жамиятда кайфият бир хил эмас. Баъзи фуқаролар байрамни нишонлаш тарафдори бўлса, бошқалар мавжуд сиёсий тизим шароитида Наврўзнинг аҳамияти йўқлигини билдирмоқда.
Мутахассислар ва кузатувчилар уруш пайтида нишонланаётган бу йилги Наврўз Эрон жамиятидаги ижтимоий ва руҳий ҳолатни яққол акс эттираётганини қайд этишган.
Эронликлар 1980 йилларда ҳам, Ироқ билан 8 йиллик можаро пайтида, Наврўзни шундай уруш шароитида нишонлаган.
