Эрон зарбалари АҚШ ҳарбий базаларига 800 млн доллар зарар етказди — BBC
Зарарнинг катта қисми THAAD тизими ва радар қурилмаларига тўғри келган.
BBC таҳлилига кўра, Эрон томонидан Яқин Шарқдаги АҚШ ҳарбий базаларига берилган зарбалар дастлабки 14 кунлик ҳарбий ҳаракатлар давомида тахминан 800 миллион доллар миқдорида зарар етказган.
Ҳисоботда қайд этилишича, зарарларнинг асосий қисми Эрон томонидан ҳарбий ҳаракатларнинг биринчи ҳафтасида амалга оширилган жавоб зарбалари натижасида юзага келган. Нишонлар қаторида Иордания ҳудудидаги авиабазада жойлашган Terminal High Altitude Area Defense (THAAD) ракетага қарши мудофаа тизими ҳамда AN/TPY-2 радар тизими бўлган. Таҳлилга кўра, AN/TPY-2 радар тизимининг қиймати тахминан 485 миллион долларни ташкил этади.
Шунингдек, зарбалар Яқин Шарқдаги АҚШ ҳарбий базаларининг бинолари ва инфратузилмасига ҳам зарар етказган бўлиб, унинг қиймати қарийб 310 миллион долларга баҳоланмоқда.
Сунъий йўлдош тасвирлари таҳлили Эрон камида учта АҚШ авиабазасига бир неча бор зарба берганини кўрсатган. Булар — Ali al-Salim авиабазаси (Қувайт), Al-Udeid авиабазаси (Қатар) ҳамда Prince Sultan авиабазаси (Саудия Арабистони).
BBCга кўра, такрорий зарбалар Эроннинг асосий ҳарбий нишонларни аниқ мўлжалга олган ҳолда ҳужум қилганини кўрсатади.
Аввалроқ Пентагон расмийлари сенаторлар билан ёпиқ брифинг чоғида урушнинг дастлабки олти кунида АҚШ камида 11,3 миллиард доллар сарфлаганини маълум қилган. ABC News хабарига кўра, дастлабки икки куннинг ўзида ўқ-дорилар учун 5,6 миллиард доллар сарфланган.
