Эрондаги зарбалар яқин кунларда кучаяди — Исроил мудофаа вазири
Исроил операциялар барча ҳарбий мақсадлар бажарилгунга қадар давом этишини билдирди.
Исроил мудофаа вазири Исраэл Кац яқин кунларда Эрон ҳудудидаги нишонларга берилаётган зарбалар сезиларли даражада оширилишини маълум қилди. Бу ҳақда Ynet нашри хабар берди.
Вазирнинг таъкидлашича, Исроил Мудофаа Кучлари (IDF) ҳамда АҚШ ҳарбийлари томонидан Эрон режими ва унга тегишли инфратузилма объектларига қарши амалга оширилаётган зарбалар кўлами кенгайтирилади.
“IDF ва АҚШ ҳарбийлари томонидан Эрон режими ва у таянадиган инфратузилмага қарши зарбалар интенсивлиги сезиларли даражада ошади”, — деган вазир.
Унинг сўзларига кўра, ҳужумлар шу ҳафтадан бошлаб кучайиши кутилмоқда. Исроилда операциялар якшанба кунидан янада фаоллашиши мумкин.
Исраэл Кац шунингдек, IDF ўз зиммасига юклатилган вазифаларни бажариш учун етарли ҳарбий салоҳиятга эга эканини таъкидлаган. Унинг айтишича, операциялар белгиланган барча ҳарбий мақсадларга эришилгунга қадар давом этади.
Аввалроқ Аббос Ароқчи бошчилигидаги Эрон ташқи ишлар вазирлиги Теҳрон вақтинчалик сулҳга рози бўлиш ниятида эмаслигини билдирган эди. Унинг сўзларига кўра, Эрон АҚШ ва Исроил билан қарама-қаршиликка якуний сиёсий келишув орқали барҳам берилишини талаб қилмоқда.
