Шавкат Мирзиёев Ўзбекистон фуқароларини Наврўз байрами билан қутлади
Давлат раҳбари эртага нишонланадиган Маҳалла тизими ходимлари куни муносабати билан маҳалла раислари ва фаолларини, барча юртдошларни табриклади.
Бугун Янги Ўзбекистон боғида Наврўз муносабати билан тантанали маросимда Шавкат Мирзиёев мамлакат аҳлини байрам билан қутлади.
Президент Наврўзни табиий уйғониш ва руҳий янгиланиш рамзи сифатида таъкидлаб, барча юртдошлар, шунингдек, олис ва яқин мамлакатларда яшаётган ватандошларимизга эзгу тилакларини изҳор қилди.
“Баҳор фаслида жонажон диёримизга шарқона янги йил кириб келмоқда. Бугун Наврўзни Рамазон ҳайити билан бирга нишонламоқдамиз. Байрам барчага тинчлик ва бахт олиб келсин”, — деди давлат раҳбари.
Президент табиат уйғониши, осмондан ёғаётган обираҳмат ва шаҳар ҳамда қишлоқларда сайил-томошалар бошлангани ҳақида сўзлаб, Наврўз кунларида халқимизнинг бирдамлиги ва бунёдкорлик салоҳияти янада кўзга ташланаётганини таъкидлади.
Шавкат Мирзиёев байрам қадриятларига содиқлик, миллат, тил ва динидан қатъи назар барча юртдошларни рози қилиш йўлида олиб борилаётган ишлар янги босқичга кўтарилганини қайд этди. Бу йилги Наврўз тадбирлари “Наврўзни улуғлаш – инсонни улуғлашдир” шиори остида ўтказилмоқда.
Президент янги иш ўринлари яратиш, камбағалликни камайтириш, ижтимоий ҳимояни кучайтириш, замонавий корхоналар, уй-жойлар, таълим, тиббиёт, маданият ва спорт обектларини барпо этиш бўйича амалга оширилаётган лойиҳаларга эътибор қаратди, ёшларни замонавий билим ва касбларни эгаллашга, баркамол авлод бўлиб вояга етишга, ягона Ватан ва ягона халқ сифатида янги ҳаёт ва келажак яратишга чақирди. Миришкор деҳқон ва фермерлар меҳнати халқимиз ризқ-у насибасини бойитаётгани ва давлат томонидан доимий қўллаб-қувватланиши таъкидланди.
Шунингдек, давлат раҳбари эртага нишонланадиган Маҳалла тизими ходимлари куни муносабати билан жонкуяр маҳалла раислари ва фаолларини, барча юртдошларни табриклаб, уларга янги муваффақиятлар тилади.
