АҚШ ва Эрон ўртасида келажакдаги музокаралар бўйича муҳокамалар бошланди — Axios
АҚШ ва Эрон ўртасида тўғридан-тўғри алоқа бўлмаса-да, Миср ва Қатар воситачилик қилмоқда.
Axios нашрининг хабар беришича, АҚШ маъмурияти Эрон билан келажакда ўтказилиши мумкин бўлган тинчлик музокараларининг эҳтимолий йўналишларини муҳокама қилишни бошлаган. Нашр АҚШ расмийси ҳамда бошқа манбаларга таяниб ёзишича, Теҳрон ҳам бундай музокаралардан манфаатдор эканини билдирган.
Маълумотларга кўра, АҚШ президенти маъмуриятининг элчиси Стив Виткофф ҳамда президентнинг куёви Жаред Кушнер эҳтимолий музокаралар жараёнида иштирок этмоқда. Axios манбаларининг таъкидлашича, улар илгари Женевада ўтказилган делегациялар учрашувида тақдим этилган шартларга ўхшаш таклифлар асосида иш олиб бормоқда.
АҚШ расмийси нашрга берган изоҳида сўнгги кунларда Вашингтон ва Теҳрон ўртасида тўғридан-тўғри алоқа бўлмаганини билдирган. Шу билан бирга, Миср, Қатар ва Буюк Британия икки давлат ўртасида воситачилик алоқаларини ўрнатишга ҳаракат қилаётгани қайд этилган.
Манбаларга кўра, Миср ва Қатар АҚШ томонига Эрон музокараларда иштирок этишга тайёрлигини маълум қилган. Шунингдек, маслаҳатлашувлар давомида Эронга тегишли музлатилган активларни қайтариш масаласи ҳам муҳокама қилиниши мумкинлиги айтилмоқда.
Эслатиб ўтамиз, Вашингтон ва Теҳрон ўртасида Эрон ядровий дастури бўйича музокаралар жорий йил 6-феврал куни қайта бошланган эди. Сўнгги босқич 26 феврал куни Женевада бўлиб ўтган.
Музокараларда Эрон делегациясига Аббос Ароқчи, АҚШ томонига эса Стив Виткофф ва Жаред Кушнер бошчилик қилган.
Феврал ойи охирида Эрон расмийлари уранни бойитиш жараёнини тўхтатмасликларини маълум қилган эди. Техник маслаҳатлашувларни март ойининг бошида Вена шаҳрида МАГАТЭ ҳудудида давом эттириш режалаштирилган, бироқ 28 феврал куни АҚШ ва Исроил томонидан Эронга қарши ҳарбий операция бошлангани сабабли жараён тўхтаб қолган.
