“Бошқа давлатлар раҳбарларининг бизга қўшилиш вақти келди” — Нетаньяху
Исроил бош вазири бошқа давлатларни Эронга қарши ҳарбий ҳаракатларга қўшилишга чақирди.
Исроил Бош вазири Биньямин Нетаньяху халқаро ҳамжамиятни Эронга қарши ҳарбий ҳаракатларда фаолроқ иштирок этишга чақирди. Унинг таъкидлашича, айрим давлатлар аллақачон бу йўналишда қадам ташлай бошлаган.
Якшанба куни Нетаньяху Эрон ракета ҳужумига учраган Исроилнинг Арад шаҳрига ташриф буюриб, дунё етакчиларини Исроил ва АҚШ билан биргаликда Теҳронга қарши курашга қўшилишга чақирди.
“Бошқа давлатлар раҳбарларининг ҳам бизга қўшилиш вақти келди”, — деди у. Нетаньяхунинг фикрича, Эроннинг ҳаракатлари нафақат Исроил, балки бутун дунё, жумладан Европа хавфсизлигига ҳам таҳдид солмоқда.
Исроил бош вазири Эроннинг Қуддусдаги муқаддас жойлар яқинига қилинган ҳужумларини ҳам қоралаб, зарбалар Ғарбий девор, Муқаддас қабр черкови ва Ал-Ақсо масжиди яқинида амалга оширилганини таъкидлади. Унинг сўзларига кўра, бу ҳужумларда мўъжиза туфайли ҳеч ким жабрланмаган.
Нетаньяху можарони Эрон ҳукмрон доиралари ва Ислом инқилоби қўриқчилари корпусига қарши кураш сифатида баҳолаб, Исроил Эрон ҳудудидаги ҳарбий ва стратегик нишонларга зарбаларни давом эттиришини маълум қилди.
Шунингдек, у АҚШ президенти Дональд Трампга Эронга қарши ҳаракатларда етакчилик қилаётгани учун миннатдорчилик билдирган.
Айни пайтда Туркия ташқи ишлар вазири Ҳакан Фидан ҳам араб давлатлари Эронга ўз ҳудудларига қилинган зарбалар юзасидан огоҳлантириш юборганини маълум қилган. Унинг сўзларига кўра, Форс кўрфази давлатлари ҳам АҚШ ва Исроилнинг Эрон билан боғлиқ ҳарбий операцияларига қўшилиш эҳтимолини кўриб чиқмоқда.
Нетаньяху шунингдек Эроннинг муҳим энергетика йўлаги ҳисобланган Ҳормуз бўғозини ёпиш ҳаракатларини тилга олиб, бу глобал энергетика ва юк ташиш тизимларига жиддий таҳдид солаётганини таъкидлаган.
