Энди мудофаа эмас, ҳужум стратегиясига ўтдик — Эрон генерали

Эрон АҚШ ва Исроил билан юзага келган кескинлик фонида ҳарбий стратегиясини ўзгартирганини маълум қилди. Бу ҳақда Эроннинг Хатам ал-Анбиё марказий штаби қўмондони, генерал-майор Али Абдуллоҳий баёнот берди.

 

Унинг сўзларига кўра, Ислом Республикаси қуролли кучлари мудофаа тактикасидан ҳужум стратегиясига ўтган ва уруш олиб бориш усуллари янгиланган.

 

Генерал Абдуллоҳий Эрон армияси имкони қадар самарали ҳаракат қилаётганини таъкидлади. У, шунингдек, мамлакатнинг ёш олимлари ва ҳарбий мутахассислари замонавий қуроллар яратиш устида ишлаётганини билдириб, бу қуроллар рақибларнинг ҳисоб-китобларини бузиши мумкинлигини қайд этди.

 

“Қуролли кучлар ва ғайратли ёш олимларимиз душман ҳисоб-китобларини издан чиқариши мумкин бўлган замонавий қуролларни ишлаб чиқмоқда. Душманлар буни маълум даражада англаб етди. Биз бу тенденцияни давом эттирамиз ва жанг майдонида янги кутилмаган ҳодисаларни тақдим этамиз”, — деди у.

 

Теҳрон аввалроқ агар АҚШ ёки Исроил Эроннинг ёқилғи-энергетика инфратузилмасига яна зарба берса, Яқин Шарқдаги Америка энергетика ва ахборот инфратузилмаси объектларига ҳужум қилиши мумкинлиги ҳақида огоҳлантирган эди.

 

Шунингдек, Tasnim агентлиги манбаларига кўра, агар Харк оролини эгаллаб олишга уриниш бўлса, Теҳрон томонидан “мисли кўрилмаган” жавоб чоралари кўрилиши мумкин.

 

Мазкур орол Эрон нефть экспорти учун стратегик аҳамиятга эга бўлиб, мамлакат хом нефть экспортининг қарийб 90 фоизи айнан шу терминал орқали амалга оширилади.

 

22 март куни Дональд Трамп Теҳронга ультиматум қўйиб, агар Ҳормуз бўғози 48 соат ичида очилмаса, Эроннинг электр станцияларига зарба берилиши мумкинлигини билдирган эди. Бунга жавобан Теҳрон минтақадаги АҚШ энергетика ва ахборот инфратузилмаси объектларига қарши жавоб зарбалари берилишини маълум қилди.