Эрон 22 кундан бери интернетсиз қолмоқда
АҚШ ва Исроилнинг Эрон ҳудудидаги ҳарбий ҳаракатлари интернет узилишига сабаб бўлди.
Эронда интернет алоқаси 500 соатдан ортиқ вақт давомида деярли тўлиқ узилиб қолган. Бу ҳақда халқаро интернет мониторинг хизмати NetBlocks хабар берди.
Ташкилотнинг баёнотида: “528 соат ўтди ва Эрон интернетсиз 23-кунига кирмоқда”, дейилади.
Интернет узилиши минтақада ҳарбий вазиятнинг кескинлашиши фонида юз берган. 28 феврал куни АҚШ ва Исроил Эронга қарши ҳарбий операция бошлади, натижада Теҳрон ва бошқа шаҳарлар ҳужумларга учраган. Бунга жавобан Ислом инқилоби қўриқчилари корпуси Исроилга қарши кенг кўламли операция эълон қилган.
Шунингдек, Баҳрайн, Иордания, Қатар, Қувайт, БАА ва Саудия Арабистони каби минтақадаги бир қатор мамлакатлардаги АҚШ нишонларига ҳам зарбалар берилган.
Натижада, Эронда фуқаролар ва бизнеслар глобал интернет тармоғидан узоқ вақт давомида ажралган, бу эса минтақадаги ахборот оқимини чеклади ва халқаро алоқаларга жиддий таъсир кўрсатди.
