Эрон Исроилнинг Димона ва Арад шаҳарларига ракета зарбалари берди
Димонада 12 тагача зарба қайд этилди, 50 дан ортиқ киши жароҳатланган.
21 март куни кечқурун Эрон томонидан Исроилнинг Димона ва Арад шаҳарларига ракета зарбалари берилди. Ҳужумлар оқибатида 100 дан ортиқ киши тан жароҳати олган. Бу ҳақда Al Jazeera нашри хабар берди.
Эрон давлат телевидениеси ушбу зарбаларни Натанздаги уранни бойитиш бўйича ядровий мажмуага қилинган ҳужумга жавоб сифатида талқин қилган. Маълумотларга кўра, ҳар иккала шаҳарда ҳам мудофаа тизими айрим ракеталарни тутиб қола олмаган.
Арад шаҳрида ракетанинг тўғридан-тўғри тушиши натижасида тўққизта турар жой биноси вайрон бўлган ва шаҳар марказига жиддий зарар етган. Исроил фавқулодда хизматлари маълумотига кўра, шаҳарда камида 88 киши жароҳатланган, улардан 10 нафари оғир аҳволда. Оғир ярадорлар орасида беш ёшли қизалоқ ҳам бор.
Димона шаҳрида эса 12 тагача зарба қайд этилгани айтилмоқда. Улардан бири турар жой биносига келиб тушган ва натижада 50 дан ортиқ киши яраланган. Расмийлар ҳозирча икки шаҳарда ҳам ҳалок бўлганлар ҳақида маълумот бермаган.
Исроиллик ҳарбий журналист Сергей Ауслендернинг таъкидлашича, вайронагарчиликлар ва жароҳатланганлар сонининг кўплигига қарамай, қурбонлар бўлмагани “деярли мўъжиза” ҳисобланади. У, шунингдек, айрим тутиб олувчи ракеталар нишонни йўқ қила олмаганини ҳам қайд этган.
Исроил бош вазири Бинямин Нетаняху ҳужумларга муносабат билдириб, бу оқшом Исроил учун “оғир кеча” бўлганини айтиб, Эронга қарши зарбалар давом этишини маълум қилган.
Шу билан бирга, МАГАТЭ агентлиги Димонадаги Шимон Перес номидаги ядровий тадқиқот марказига зарар етгани ҳақида маълумот олмаганини ҳамда ҳудудда радиация даражаси ошгани қайд этилмаганини билдирган.
