Истанбулда портлаш оқибатида икки бино қулади
Дастлабки маълумотларга кўра, ҳодисага газ портлаши сабаб бўлган.
Истанбул шаҳрининг марказий Фотиҳ тумани ҳудудида иккита турар-жой биноси қулади. Бу ҳақда AHaber телеканали хабар берди.
Маълумотларга кўра, бинолар бир-бирига жуда яқин қурилган бўлиб, улардан бирида содир бўлган портлаш “домино эффекти”ни юзага келтирган. Натижада қўшни бино ҳам қулаган.
Маълум қилинишича, ҳодиса табиий газ портлаши оқибатида юз берган бўлиши мумкин. Унинг сўзларига кўра, ҳодиса вақтида камида тўққиз киши вайроналар остида қолган. Етти киши касалхонага ётқизилган, яна бир кишига воқеа жойида тиббий ёрдам кўрсатилган.
Ҳодиса жойида қутқарув операцияси бошланган. Бироқ тор кўчалар ва ҳудуднинг жуда зич қурилгани қутқарув техникаларининг кириб боришини қийинлаштирмоқда. Шунга қарамай, қидирув-қутқарув ишлари давом этмоқда ва вайроналар остида қолганларни топиш учун барча кучлар сафарбар этилган.
